பயங்கரம்..! பாட்டி வீட்டு விருந்துக்குச் சென்ற சிறுமி… திடீரென தலையில் இறங்கிய வாள் – பதைபதைக்க வைக்கும் சிசிடிவி காட்சிகள்…!!

மத்தியப் பிரதேச மாநிலம் போபாலில், இரு பிரிவினருக்கு இடையே ஏற்பட்ட மோதலில் 6 வயது சிறுமி வாளால் தாக்கப்பட்ட சம்பவம் பெரும் அதிர்ச்சியை ஏற்படுத்தியுள்ளது. ஷாஜகானாபாத் பகுதியைச் சேர்ந்த மிரல் அகமது என்ற அந்தச் சிறுமி, தனது பெற்றோருடன் இருசக்கர வாகனத்தில் பாட்டி வீட்டிற்கு விருந்துக்காகச் சென்று கொண்டிருந்தபோது இந்த விபரீதம் நிகழ்ந்துள்ளது. செல்லும் வழியில் ஒரு குறுகிய தெருவில் சுமார் 70 முதல் 80 பேர் கும்பலாகச் சேர்ந்து மோதலில் ஈடுபட்டிருந்தனர்.

கும்பல் மோதிக் கொண்டிருந்த இடத்தைக் கடக்க முயன்றபோது, கூட்டத்தில் இருந்த ஒருவர் வீசிய வாள் எதிர்பாராதவிதமாகச் சிறுமியின் தலையில் பலமாகத் தாக்கியது. இதில் சிறுமியின் தலையிலிருந்து ரத்தம் கொட்டியதைக் கண்டு அதிர்ச்சியடைந்த பெற்றோர், உடனடியாக அவரை அருகில் உள்ள மருத்துவமனைக்குக் கொண்டு சென்றனர். அங்கு சிறுமிக்குத் தீவிர சிகிச்சை அளிக்கப்பட்டு வருகிறது. சிறுமியின் தந்தை அஞ்சல் துறையில் பணியாற்றி வருகிறார் என்பது குறிப்பிடத்தக்கது.

இச்சம்பவம் குறித்துத் தகவல் அறிந்த காவல்துறையினர், அடையாளம் தெரியாத நபர்கள் மீது வழக்குப் பதிவு செய்து விசாரணை நடத்தி வருகின்றனர். அந்தப் பகுதியில் உள்ள சிசிடிவி (CCTV) காட்சிகளை ஆய்வு செய்ததில், சில இளைஞர்கள் கையில் ஆயுதங்களுடன் சுற்றித் திரிவது உறுதி செய்யப்பட்டுள்ளது. குற்றவாளிகளைத் தேடும் பணி தீவிரப்படுத்தப்பட்டுள்ள நிலையில், இந்தச் சம்பவம் அப்பகுதியில் பெரும் பதற்றத்தையும் அச்சத்தையும் உருவாக்கியுள்ளது.