“வாங்கலைன்னா காசு கொடு…” ஒரு துண்டு பழத்துக்கு ₹200-ஆ…? தமிழக ஃபுட் பிளாக்கர் ரிஸ்வானாவை வம்புக்கு இழுத்த கடைக்காரர்… வீடியோ வைரல்….!!

கர்நாடக மாநிலம் பெங்களூருவில் தமிழகத்தைச் சேர்ந்த பிரபல உணவுப் பதிவர் ரிஸ்வானா ஹுமாயூனுக்கு நேர்ந்த அவமரியாதை சமூக வலைதளங்களில் பெரும் விவாதத்தை ஏற்படுத்தியுள்ளது. தெருவோரக் கடை ஒன்றில் பழங்களை வாங்குவதற்கு முன்னதாக அதன் சுவையைச் சரிபார்க்க அவர் ‘சாம்பிள்’ கேட்டுள்ளார். ஆனால், பழத்தைச் சாப்பிட்டுப் பார்த்த பிறகு அவர் வாங்க மறுத்ததால், ஆத்திரமடைந்த அந்த வியாபாரி சாம்பிள் கொடுத்ததற்காக ரூ.200 தருமாறு மிரட்டியுள்ளார். இது தொடர்பாக ரிஸ்வானா வீடியோ எடுக்கத் தொடங்கியதும், அந்த வியாபாரி அவரிடம் மிகவும் ஆக்ரோஷமாக வாக்குவாதம் செய்ததோடு, “கன்னடத்தில் பேசு” என்று கூறி மொழிப் பிரச்சினையை முன்னிறுத்தி அவரைத் துன்புறுத்தியுள்ளார்.

இந்தச் சம்பவம் பெங்களூருவுக்கு வரும் சுற்றுலாப் பயணிகள் மற்றும் பார்வையாளர்கள் மத்தியில் மிகுந்த அதிருப்தியை ஏற்படுத்தியுள்ளது. ஒரு வியாபாரப் பிரச்சினையில் மொழியை ஒரு கருவியாகப் பயன்படுத்திப் பெண்ணிடம் அநாகரிகமாக நடந்துகொண்டது கண்டனத்திற்குரியது என்று பலரும் கருத்து தெரிவித்து வருகின்றனர். மொழியானது மக்களை இணைக்க வேண்டுமே தவிர, இது போன்ற மிரட்டல்களுக்கும் துன்புறுத்தல்களுக்கும் ஒரு காரணமாக அமையக்கூடாது என்பதே பலரின் ஆதங்கமாக உள்ளது. இந்த வீடியோ இணையத்தில் வேகமாகப் பரவி வரும் நிலையில், பெங்களூருவின் நற்பெயருக்கு இது போன்ற ஒரு சிலரின் செயல்பாடுகள் களங்கம் விளைவிப்பதாகச் சமூக ஆர்வலர்கள் கவலை தெரிவித்துள்ளனர்.