நாடே அதிர்ச்சி..! “12 ஆண்டுகளில் 130 குழந்தைகள்” சிகிச்சைக்கு வந்த பிஞ்சுகளைச் சிதைத்த குழந்தைகள் நல மருத்துவர்.. பகீர் பின்னணி..!!

ஜெர்மனியில் பெர்லின் நகருக்கு அருகே உள்ள பிராண்டன்பர்க் (Brandenburg) மாநிலத்தின் மருத்துவமனைகளில் பணியாற்றி வந்த ஒரு குழந்தை நல மருத்துவர் மீது, கடந்த 12 ஆண்டுகளில் 130-க்கும் மேற்பட்ட சிறார் பாலியல் வன்கொடுமை வழக்குகள் சுமத்தப்பட்டுள்ளன. 2013 டிசம்பர் முதல் 2025 நவம்பர் வரையிலான காலகட்டத்தில் இந்த கொடூர சம்பவங்கள் நடந்ததாக அரசு வழக்கறிஞர்கள் தெரிவித்துள்ளனர். பாதிக்கப்பட்டவர்களில் பெரும்பாலானோர் அந்த மருத்துவமனையில் சிகிச்சைக்காக அனுமதிக்கப்பட்ட குழந்தைகள் என்பது குறிப்பிடத்தக்கது.

இந்த விவகாரம் கடந்த ஆண்டு நவம்பர் மாதம் வெளிச்சத்திற்கு வந்தது. பாதிக்கப்பட்ட ஒரு குழந்தையின் தாய் அளித்த புகாரின் அடிப்படையில், அந்த மருத்துவர் உடனடியாக கைது செய்யப்பட்டார். காவல்துறையினர் நடத்திய தீவிர சோதனையில், அவரிடமிருந்து ஏராளமான தரவு சேமிப்பு சாதனங்கள் (Data storage devices) கைப்பற்றப்பட்டன. அதன் பின்னரே, அவர் பல ஆண்டுகளாகத் தொடர்ந்து இதுபோன்ற குற்றங்களில் ஈடுபட்டு வந்தது விசாரணையில் தெரியவந்தது. தற்போது அவர் நீதிமன்றக் காவலில் வைக்கப்பட்டுள்ளார்.

அந்த மருத்துவர் தனது பதவியைப் பயன்படுத்தி, மருத்துவப் பரிசோதனைகள் என்ற பெயரில் குழந்தைகளைத் தவறாகக் கையாண்டதாகக் கூறப்படுகிறது. இந்தச் சம்பவம் ஜெர்மனி முழுவதும் பெரும் அதிர்ச்சியை ஏற்படுத்தியுள்ளது. அந்த மருத்துவரால் பாதிக்கப்பட்ட குழந்தைகளின் எண்ணிக்கை இன்னும் அதிகரிக்கக்கூடும் என அஞ்சப்படுகிறது. தற்போது நீதிமன்றத்தில் தாக்கல் செய்யப்பட்டுள்ள இந்த வழக்குகளில், பாலியல் வன்புணர்வு மற்றும் கடுமையான சிறார் துஷ்பிரயோகம் உள்ளிட்ட பிரிவுகளின் கீழ் குற்றச்சாட்டுகள் பதிவு செய்யப்பட்டுள்ளன.