டிரம்ப் மிரட்டலுக்கு ஈரான் கொடுத்த மரண அடி!.. “இனி ஒரு துரும்பை கூட அசைக்க முடியாது”.. உலகையே உலுக்கும் புதிய மாஸ்டர் பிளான்…!!!

ஹார்முஸ் ஜலசந்தியின் மீதான தனது பிடியை வலுப்படுத்தும் நோக்கில், ஈரான் தற்போது “ஹார்முஸ் சேஃப்” (Hormuz Safe) எனும் புதிய பிட்காயின் அடிப்படையிலான காப்பீட்டுத் திட்டத்தை அறிமுகப்படுத்தியுள்ளது. உலகின் கச்சா எண்ணெய் மற்றும் எரிவாயு தேவையில் சுமார் 20 சதவீதத்தைக் கையாளும் இந்த முக்கியமான பாதையில், கப்பல் உரிமையாளர்கள் மற்றும் ஏற்றுமதியாளர்கள் பிட்காயின் மூலம் காப்பீட்டுப் பிரீமியத்தைச் செலுத்துவதன் மூலம் பாதுகாப்பான பயணத்தை உறுதிசெய்ய முடியும். இந்தத் திட்டத்தின் மூலம் ஆண்டுக்கு 10 பில்லியன் டாலர் வருவாய் ஈட்ட ஈரான் இலக்கு நிர்ணயித்துள்ளது.

இந்தத் திட்டத்திற்குப் பின்னால் ஈரானின் மிகத் தெளிவான பொருளாதார மற்றும் மூலோபாயக் கணக்குகள் உள்ளன. ஏற்கனவே இக்கடல் பாதையில் கப்பல்கள் பயணிக்க 2 மில்லியன் டாலர் டோல் கட்டணம் வசூலித்து வரும் நிலையில், அதனை மறைமுகமாக ‘காப்பீட்டுச் சேவை’ என்ற பெயரில் மாற்றியுள்ளது. மேலும், சர்வதேசத் தடைகளைத் தவிர்க்கவே டாலர் அல்லது யூரோவிற்குப் பதிலாக, எந்தவொரு அரசாலும் எளிதில் கண்காணிக்க முடியாத பிட்காயினை ஈரான் ஊடகமாகத் தேர்ந்தெடுத்துள்ளது. இதற்காக “பெர்ஷியன் கல்ஃப் ஸ்ட்ரெய்ட் அத்தாரிட்டி” (PGSA) என்ற புதிய அமைப்பையும் ஈரான் உருவாக்கியுள்ளது.

ஈரானின் இந்த அதிரடி நடவடிக்கை சர்வதேச அளவில் பெரும் கவலையை உருவாக்கியுள்ளது. சர்வதேச கடல் சட்டங்களின்படி, ஹார்முஸ் போன்ற சர்வதேச வழித்தடங்களில் கட்டாயக் கட்டணம் வசூலிப்பது சட்டவிரோதமானது என்று கருதப்பட்டாலும், ஈரான் இதனைத் தனது இறையாண்மை சார்ந்த பாதுகாப்பு நடவடிக்கையாக நியாயப்படுத்துகிறது. போருக்குப் பிந்தைய சூழலில், இப்பாதை இனி ஒருபோதும் பழைய இயல்பு நிலைக்குத் திரும்பாது என்று ஈரான் எச்சரித்திருப்பது, உலக நாடுகளுக்கு, குறிப்பாக இப்பாதையைச் சார்ந்திருக்கும் நாடுகளுக்குப் பெரும் சவாலாக மாறியுள்ளது.

இந்தியாவைப் பொறுத்தவரை, இந்தத் திட்டம் கச்சா எண்ணெய் இறக்குமதிச் செலவை நேரடியாக உயர்த்தும் அபாயம் உள்ளது. கப்பல் காப்பீட்டுச் செலவு அதிகரிப்பது, ஒட்டுமொத்த இறக்குமதிச் செலவை அதிகரித்து, உள்நாட்டில் பெட்ரோல் மற்றும் டீசல் விலையேற்றத்திற்கு வித்திடும். எண்ணெய், கிரிப்டோகரன்சி மற்றும் புவிசார் அரசியல் ஆகியவை ஒன்றிணைந்துள்ள இந்தச் சூழல், உலகப் பொருளாதாரம் மீண்டும் ஒரு நெருக்கடியைச் சந்திப்பதற்கான அறிகுறியாகவே பார்க்கப்படுகிறது.