இனி ‘தளபதி’ ஆட்டம் ஆரம்பம்!… தேதி குறிச்சாச்சு.. மாமல்லபுரத்தில் நடக்கப்போகும் ‘மெகா’ ஈவென்ட்… விஜயின் மாஸ்டர் பிளான்…!!

தமிழகம், புதுச்சேரி உள்ளிட்ட மாநிலங்களுக்கு சட்டமன்றத் தேர்தல் அறிவிக்கப்பட்டுள்ள நிலையில், தமிழகத்தில் ஏப்ரல் 23ஆம் தேதி வாக்குப்பதிவு நடைபெற உள்ளது. நாம் தமிழர் கட்சி ஏற்கனவே 234 தொகுதிகளுக்கும் வேட்பாளர்களை அறிவித்துவிட்ட நிலையில், திமுக, அதிமுக, பாஜக உள்ளிட்ட பிரதான கட்சிகள் மார்ச் 30ஆம் தேதி வேட்புமனுத்தாக்கல் தொடங்குவதற்கு முன்னதாகத் தங்களது பட்டியலை வெளியிடத் தயாராகி வருகின்றன. இதற்கிடையே, தேர்தல் பணிகளுக்கு நடுவே நடிகர் விஜய் வளைகாப்பு நிகழ்ச்சிக்காக மும்பை சென்றது அரசியல் வட்டாரத்தில் விவாதங்களை ஏற்படுத்தியுள்ளது.

234 தொகுதிகளிலும் தனித்துப் போட்டியிடும் தமிழக வெற்றிக் கழகம் (தவெக), மார்ச் 27ஆம் தேதி மாமல்லபுரத்தில் பிரம்மாண்ட வேட்பாளர் அறிமுகக் கூட்டத்தை நடத்தத் திட்டமிட்டுள்ளதாகத் தகவல்கள் வெளியாகியுள்ளன. இந்தக் கூட்டத்தில் கட்சியின் தலைவர் விஜய் பங்கேற்று வேட்பாளர்களை மேடையில் அறிமுகம் செய்யவுள்ளார். இதுவரை சுமார் 117 வேட்பாளர்களுக்கான நேர்காணல்கள் மட்டுமே நிறைவடைந்துள்ளதால், முதற்கட்டமாக இந்த 117 தொகுதிகளுக்கான வேட்பாளர்கள் மட்டும் அன்று அறிவிக்கப்பட வாய்ப்புள்ளதாகக் கூறப்படுகிறது.

ஒருவேளை மீதமுள்ள தொகுதிகளுக்கான வேட்பாளர் தேர்வினை இன்று அல்லது நாளைக்குள் தவெக தலைமை முடித்துவிட்டால், நாளை மறுநாள் நடைபெறும் கூட்டத்திலேயே 234 தொகுதிகளுக்கும் வேட்பாளர்கள் அறிமுகம் செய்யப்படலாம் என நிர்வாகிகள் தெரிவிக்கின்றனர். சீமான் ஏற்கனவே வேட்பாளர்களை அறிவித்து களத்தில் முந்துவதால், தவெக-வும் தனது வேட்பாளர் பட்டியலை விரைவாக வெளியிட்டுப் பிரச்சாரத்தைத் தீவிரப்படுத்தத் திட்டமிட்டுள்ளது. மார்ச் 30-ல் வேட்புமனுத்தாக்கல் தொடங்குவது குறிப்பிடத்தக்கது.