1 நிமிசக் கோபம்.. அடுத்த நிமிடமே தூக்கில் தொங்கிய தம்பதி… அனாதையான 8 மாத குழந்தை… நெஞ்சை உலுக்கும் சம்பவம்…!!

ராஜஸ்தான் மாநிலம் தௌசா மாவட்டத்தில் உள்ள சைந்தல் பகுதியில், தம்பதியினர் தற்கொலை செய்துகொண்ட சம்பவம் அப்பகுதி மக்களை சோகத்தில் ஆழ்த்தியுள்ளது. சிங்புரா கிராமத்தைச் சேர்ந்த 24 வயது ஜித்தேந்திர மீனா மற்றும் அவரது 22 வயது மனைவி மனிஷா மீனா ஆகிய இருவருக்கும் கடந்த இரண்டு ஆண்டுகளுக்கு முன்புதான் திருமணம் நடைபெற்றது. இவர்களுக்கு எட்டு மாதமே ஆன ஒரு பெண் குழந்தை உள்ளது. சனிக்கிழமை காலை தம்பதியிடையே ஏற்பட்ட வாக்குவாதம் விபரீதத்தில் முடிந்துள்ளது.

வாக்குவாதத்திற்குப் பிறகு ஜித்தேந்திரா வீட்டை விட்டு வெளியே சென்றுள்ளார். சிறிது நேரம் கழித்து அவர் திரும்பி வந்தபோது, மனைவி மனிஷா தூக்கில் தொங்குவதைக் கண்டு அதிர்ச்சியடைந்தார். இதனால் நிலைகுலைந்து போன ஜித்தேந்திரா, தனது உறவினர்களுக்கு போன் செய்து “மனைவி தற்கொலை செய்துகொண்டார், நானும் உயிரை விடப்போகிறேன்” என்று கூறிவிட்டு தானும் தூக்கிட்டு தற்கொலை செய்துகொண்டார். அக்கம்பக்கத்தினர் வீட்டிற்குள் சென்று பார்த்தபோது, தம்பதியினர் இருவரும் சடலமாகத் தொங்க, அவர்களுக்கு கீழே 8 மாத பச்சிளம் குழந்தை அழுதுகொண்டிருந்த காட்சி நெஞ்சை உலுக்கியது.

தகவலறிந்து வந்த போலீசார், இருவரது உடல்களையும் மீட்டு பிரேதப் பரிசோதனைக்காக அனுப்பி வைத்தனர். குழந்தையின் அழுகுரலைக் கேட்டு ஓடிவந்த அண்டை வீட்டார் குழந்தையை மீட்டு போலீசாரிடம் ஒப்படைத்தனர். முதற்கட்ட விசாரணையில் இது குடும்பத் தகராறு காரணமாக நடந்த தற்கொலை என்று தெரிந்தாலும், போலீசார் மற்ற கோணங்களிலும் விசாரணை நடத்தி வருகின்றனர். ஒரு சிறிய சண்டையால் பெற்றோர் தற்கொலை செய்துகொண்டதால், அந்த எட்டு மாதக் குழந்தை இன்று ஆதரவற்ற நிலைக்குத் தள்ளப்பட்டுள்ளது.