இந்தியா கூட்டணியில் த.வெ.க இணையுமா?.. செய்தியாளர் கேள்விக்கு அமைச்சர் செங்கோட்டையன் கொடுத்த ‘க்ளூ’.. அதிரும் அறிவாலயம்..!!

சென்னை எழிலகத்தில் வருவாய் மற்றும் பேரிடர் மேலாண்மைத்துறை அதிகாரிகளுடன் அமைச்சர் செங்கோட்டையன் இன்று ஆலோசனையில் ஈடுபட்டார். அதன் பின்னர் செய்தியாளர்களைச் சந்தித்த அவர், ரேஷன் கார்டுகள் மற்றும் முதியோர் உதவித்தொகை போன்ற மக்கள் நலத்திட்டங்களின் பலன்கள் பொதுமக்களுக்கு மிக எளிதாகச் சென்றடைவது குறித்தும், துறையில் உள்ள குறைகளை நிவர்த்தி செய்வது குறித்தும் விரிவாக விவாதிக்கப்பட்டதாகத் தெரிவித்தார். மேலும், பத்திரப் பதிவில் உள்ள தேக்க நிலையை நீக்கி, பத்திரப் பதிவு செய்தவர்களுக்குத் தாமதமின்றி உடனடியாகப் பட்டாக்கள் கிடைக்கத் தேவையான துரித நடவடிக்கைகள் மேற்கொள்ளப்பட்டு வருவதாகவும் அவர் உறுதி அளித்தார்.

தமிழ்நாட்டில் தென்மேற்குப் பருவமழை தொடங்கியுள்ள சூழலில், பேரிடர்களை எதிர்கொள்ள அரசு முழு அளவில் தயாராக இருப்பதாக அமைச்சர் கூறினார். குறிப்பாக, நெல்லை மாவட்டம் மாஞ்சோலையில் கூடுதல் மழை பெய்துள்ளதைக் குறிப்பிட்ட அவர், நீலகிரி மாவட்டத்தில் நிலச்சரிவு போன்ற அவசர காலப் பேரிடர்களை எதிர்கொள்ளும் பொருட்டு ஹெலிகாப்டர் தயார் நிலையில் நிறுத்தி வைக்கப்பட்டுள்ளது என்றார். மேட்டூர் அணைக்கு தற்போது நீர்வரத்து குறைவாகவே உள்ளது என்றும், அதன் நீர்ப்பிடிப்புப் பகுதிகளில் பெரிய அளவில் மழை இல்லை என்றும் குறிப்பிட்ட அவர், மத்திய அரசு பேரிடர் மேலாண்மை நிதியாக ₹1000 கோடியை வழங்கியுள்ளதாகவும், தேவையான கூடுதல் நிதியை முன்கூட்டியே கேட்டுப் பெற்று வருவதாகவும் தெரிவித்தார்.

தொடர்ந்து பேசிய அமைச்சர் செங்கோட்டையன், தமிழக அரசுக்குத் தேவையான இதர நிதிகள் குறித்துப் பேசுவதற்காக வரும் ஜூன் 11-ஆம் தேதி முதலமைச்சர் விஜய் டெல்லி செல்ல உள்ளதாகத் தெரிவித்தார். முதலமைச்சர் எப்போதுமே விளம்பரங்களை விடுத்துச் செயல்பாடுகளை மட்டுமே முதன்மையாகக் கருதி உழைப்பவர் என்று புகழாரம் சூட்டிய அவர், பத்திரிகை சுதந்திரம் என்பது தனிப்பட்ட நபர்களை விமர்சிப்பதாக மாறிவிடக் கூடாது என்றும் அறிவுறுத்தினார். இறுதியாக, வரும் நாடாளுமன்றத் தேர்தலில் ‘இந்தியா’ (INDIA) கூட்டணியில் தமிழக வெற்றிக் கழகம் (த.வெ.க) இணையுமா என்று செய்தியாளர்கள் எழுப்பிய கேள்விக்கு, அதுகுறித்து முதலமைச்சர் விஜய் அவர்களே இறுதி முடிவை எடுப்பார் என்று கூறி விடைபெற்றார்.