பாலைவனத்தின் புல்லட் ரயில்.. இறக்கைகள் இருந்தாலும் பறக்காது.. ஆனால் ஓடினால் காரையே முந்திடும்.. சமூக வலைத்தளங்களை கலக்கும் ‘சூப்பர் ஹீரோ’ பறவை…!

அமெரிக்காவின் தென்மேற்குப் பகுதிகள் மற்றும் மெக்சிகோவின் வறண்ட பாலைவனப் பகுதிகளில் ‘கிரேட்டர் ரோட் ரன்னர்’ எனப்படும் ஒரு தனித்துவமான பறவை வாழ்கிறது. கடுமையான வெப்பம் மற்றும் தண்ணீர் பற்றாக்குறை நிறைந்த சூழலிலும் இது எளிதாக உயிர்வாழ்கிறது. மற்ற பறவைகளைப் போல வானத்தில் நீண்ட நேரம் பறக்க விரும்பாத இப்பறவை, தரையில் அதிவேகமாக ஓடுவதையே அதிகம் விரும்புகிறது. பாலைவனத்தின் சுட்டெரிக்கும் மணலில் இதன் வேகம், சுறுசுறுப்பு மற்றும் ஓடும் திறனைப் பார்த்து வியந்துபோன மக்கள், இதனை ‘பாலைவனத்தின் புல்லட் இரயில்’ என்றும் ‘பாலைவனத்தின் சூப்பர் ஹீரோ’ என்றும் அழைக்கிறார்கள்.

இந்த ரோட் ரன்னர் பறவை மணிக்கு சுமார் 32 முதல் 42 கிலோமீட்டர் (20 முதல் 26 மைல்) வேகத்தில் ஓடும் திறன் கொண்டது. தனக்கு ஏதேனும் ஆபத்து ஏற்படும் போதோ அல்லது இரையைப் பிடிக்கும் போதோ இதன் வேகம் இன்னும் பல மடங்கு அதிகரிக்கும். இதன் நீண்ட வால் பகுதி வேகமாக ஓடும்போது உடலை சமநிலைப்படுத்த (Balance) உதவுகிறது. மேலும், இதன் வலுவான கால்களும், நீண்ட மெலிதான உடல் அமைப்பும் மணலில் தடையின்றி மின்னல் வேகத்தில் ஓடுவதற்கு ஏற்றவாறு இயற்கையாகவே அமைந்துள்ளன. நியூ மெக்சிகோவின் மாநிலப் பறவையாகக் கருதப்படும் இது, சமீபகாலமாக சமூக ஊடகங்களிலும் மிகவும் வைரலாகி வருகிறது.

https://www.instagram.com/reel/DYR_QBaJ3I7/?utm_source=ig_web_copy_link

ரோட் ரன்னர் ஒரு சிறந்த ஓட்டப்பந்தய வீரர் மட்டுமல்ல, மிகவும் புத்திசாலித்தனமான வேட்டைக்காரனும் கூட. இது பூச்சிகள், பல்லிகள், சிறிய எலிகள் மற்றும் பிற சிறிய பறவைகளை வேட்டையாடி உண்கிறது. எல்லாவற்றையும் விட ஆச்சரியமான விஷயம் என்னவென்றால், மிகவும் ஆபத்தான மற்றும் விஷத்தன்மை கொண்ட ‘ராட்டில்ஸ்னேக்’ (Rattlesnake) எனப்படும் பாம்புகளைக் கூட இது தைரியமாக எதிர்கொள்கிறது. தனது வலுவான அலகுகளால் பாம்பைத் தாக்கி, பாறைகளில் மோதி கொன்று விடுகிறது. பாலைவனத்தின் கடுமையான வெப்பத்தில், தனக்குத் தேவையான நீரின் பெரும்பகுதியை அது உண்ணும் உணவிலிருந்தே பெற்றுக் கொள்வதால், இதற்கு அதிக தண்ணீர் குடிக்க வேண்டிய அவசியமும் ஏற்படுவதில்லை.