“இப்ப குடுப்பாங்க அப்ப குடுப்பாங்க…” கடுப்பான சி.ஆர்.சுந்தர்ராஜன்… அதிரடி முடிவு… கோடிகளில் செலவு, மேடை ரெடி… தவெக இணைப்பு விழா திடீர் ரத்து…பரபரப்பு பின்னணி…!

சிவகங்கையில் முன்னாள் காங்கிரஸ் மாநில பொதுச் செயலாளரும், கார்த்தி சிதம்பரத்தின் ஆதரவாளருமாக அறியப்பட்ட சி.ஆர்.சுந்தர்ராஜன், காங்கிரஸ் கட்சியிலிருந்து விலகி தமிழக வெற்றிக் கழகத்தில் தவெக தன்னை இணைத்துக் கொள்ள முடிவு செய்தார். இதற்காக சிவகங்கை அருகே உள்ள மதகுபட்டியில் சுமார் 10 ஆயிரம் பேரை ஒன்றிணைக்கும் பிரம்மாண்டமான விழாவுக்கு ஏற்பாடுகள் செய்யப்பட்டன. கடந்த சட்டமன்றத் தேர்தலில் தனக்கு சீட்டு கிடைக்கும் என்ற நம்பிக்கையில் பல லட்சம் ரூபாய் செலவு செய்து பல்வேறு நலத்திட்ட உதவிகளைச் செய்த அவர், எதிர்பார்த்த வாய்ப்பு கிடைக்காததால் காங்கிரஸிலிருந்து வெளியேறி தவெகவில் தஞ்சம் புக திட்டமிட்டார்.

இந்த இணைப்பு விழாவைச் சிறப்பாக நடத்துவதற்காகப் பல லட்சம் ரூபாய் மற்றும் கோடிக்கணக்கில் செலவிடப்பட்டு பிரம்மாண்டமான மேடைகளும் அமைக்கப்பட்டன. முதலில் ஜூலை 19-ஆம் தேதியன்று இந்த விழா நடத்தப்படும் என்று திட்டமிடப்பட்டு, தவெக அமைச்சர் ஆனந்தின் சம்மதமும் பெறப்பட்டதாகக் கூறப்பட்டது. ஆனால், கடைசி நேரத்தில் ஜூலை 19-ஆம் தேதி விழா நடைபெறாமல் திடீரென ரத்து செய்யப்பட்டது. அதுமட்டுமின்றி, விழாவுக்கான புதிய தேதியை ஒதுக்க அமைச்சர் ஆனந்த் இதுவரை ஒப்புதல் அளிக்காததால், சி.ஆர்.சுந்தர்ராஜன் செய்வதறியாது தவித்து வருவதாக அரசியல் வட்டாரங்கள் தெரிவிக்கின்றன.

மறுபுறம், கூட்டணிக் கட்சிகளிலிருந்து வரும் நிர்வாகிகளைத் திமுக சேர்க்காமல் இருக்க வேண்டும் என்றும், திமுக இதில் கவனமாக இருக்க வேண்டும் என்றும் கார்த்தி சிதம்பரம் சமீபத்தில் தெரிவித்திருந்ததும் குறிப்பிடத்தக்கது. இதனால், தவெகவில் நடைபெறும் இந்த பிரம்மாண்ட இணைப்பு விழாவுக்குக் காங்கிரஸ் தரப்பிலிருந்தோ அல்லது கார்த்தி சிதம்பரம் மற்றும் மாநிலத் தலைவர் மாணிக்கம் தாகூர் தரப்பிலிருந்தோ முட்டுக்கட்டை போடப்பட்டுள்ளதா என்ற சந்தேகமும் அரசியல் களத்தில் எழுந்துள்ளது. பிரம்மாண்ட ஏற்பாடுகள் செய்தும் விழா தள்ளிப்போனது சிவகங்கை அரசியலில் பெரும் பரபரப்பை ஏற்படுத்தியுள்ளது.