“நான் ஃபிட்டா இருக்கேனா?”… இராணுவ வீரர்களுக்கே சவால் விடும் தல தோனி… இணையத்தை அதிரவைக்கும் வைரல் வீடியோ..!!

இந்திய அணியின் முன்னாள் கேப்டனும், சென்னை சூப்பர் கிங்ஸ் அணியின் சூப்பர் ஸ்டாருமான மகேந்திர சிங் தோனி, சென்னையில் உள்ள தேசிய பாதுகாப்புப் படை (NSG) பயிற்சி மையத்தில் கமாண்டோக்களுடன் கலந்துரையாடிய காணொளி ஒன்று ஞாயிற்றுக்கிழமை வெளியாகி சமூக வலைத்தளங்களில் வைரலாகி வருகிறது. கருப்பு நிற டி-ஷர்ட் மற்றும் ஜீன்ஸ் அணிந்து எளிமையாகக் காட்சியளிக்கும் தோனி, கையில் உணவுத் தட்டுடன் என்எஸ்ஜி வீரர்களுடன் மிகவும் இயல்பாகப் பேசி மகிழ்ந்துள்ளார். இணையவாசிகள் பலரும் இந்த வீடியோவைப் பகிர்ந்து, தோனியின் எளிமை, அமைதியான குணம் மற்றும் நகைச்சுவை உணர்வை வெகுவாகப் பாராட்டி வருகின்றனர்.

இந்தக் கலந்துரையாடலின் போது உடற்தகுதி குறித்த பேச்சு எழுந்தபோது, தோனி புன்னகையுடன் தன்னைச் சுட்டிக்காட்டி, “நான் ஃபிட்டாகத் தெரிகிறேன், இல்லையா?” என்று கேட்க, அங்கிருந்த கமாண்டோக்கள் உட்பட அனைவரும் விழுந்து விழுந்து சிரித்துள்ளனர். இந்திய ராணுவத்தில் ‘கௌரவ லெப்டினன்ட் கர்னல்’ பதவி வகிக்கும் தோனிக்கு, ஆயுதப் படைகள் மீது எப்போதும் தனி மரியாதையும் நெருங்கிய தொடர்பும் உண்டு. கடந்த 2011ஆம் ஆண்டு இப்பெருமையைப் பெற்ற அவர், ராணுவப் பயிற்சி நடவடிக்கைகளில் பங்கேற்றதுடன், அவ்வப்போது வீரர்களுடன் நேரத்தைச் செலவிடுவதையும் வழக்கமாகக் கொண்டுள்ளார்.

அதே நேரத்தில், இந்த வைரல் வீடியோ தோனியின் ஐபிஎல் எதிர்காலம் குறித்த விவாதங்களையும் ரசிகர்கள் மத்தியில் மீண்டும் கிளப்பியுள்ளது. நடப்பு ஐபிஎல் 2026 தொடரில் சென்னை சூப்பர் கிங்ஸ் அணிக்காக தோனி இன்னும் ஒரு போட்டியில் கூட விளையாடாத நிலையில், தொடர் இறுதி கட்டத்தை நோக்கி நகர்வதால் அவர் ஐபிஎல் போட்டிகளில் இருந்து ஓய்வு பெறப் போகிறாரா என்ற யூகங்கள் அதிகரித்துள்ளன. ஜார்க்கண்ட் மாநிலத்திலேயே அதிக வரி செலுத்திய தனிநபர் என்ற பெருமையைப் பெற்றுள்ள தோனி, மைதானத்திற்கு வெளியே இருந்தாலும் தனது ஒவ்வொரு அசைவிலும் தொடர்ந்து டிரெண்டிங்கில் இருந்து வருகிறார்.