மத்திய அரசு மீது வன்மமா?… கம்யூனிஸ்ட் எம்.எல்.ஏவுக்கு தமிழிசையின் மரண மாஸ் பதிலடி… இணையத்தில் வைரலாகும் பதிவு…!!

தமிழக சட்டமன்றத்தில் தமிழ்த்தாய் வாழ்த்து விவகாரம் தொடர்பாக இடதுசாரி எம்.எல்.ஏ ஒருவர் மத்திய அரசு மீது முன்வைத்த விமர்சனங்களுக்கு தமிழிசை கடும் கண்டனம் தெரிவித்துள்ளார். மத்திய உள்துறை அமைச்சகம் வெளியிட்ட சுற்றறிக்கையில், வந்தே மாதரம் பாடலை முழுமையாக தேசிய கீதத்திற்கு முன்பாக பாட வேண்டும் என்று மட்டுமே அறிவுறுத்தப்பட்டுள்ளதே தவிர, மாநிலப் பாடலை மூன்றாவதாகப் பாட வேண்டும் என எங்கும் கூறப்படவில்லை என்று அவர் தெளிவுபடுத்தியுள்ளார். தமிழ்த்தாய் வாழ்த்துக்கு முதலிடம் கொடுப்பது அனைவருக்கும் பெருமையான விஷயமே என்றும், இதில் மத்திய அரசு மீது வீண்பழி சுமத்துவது தேவையற்ற வன்மம் என்றும் அவர் சுட்டிக்காட்டியுள்ளார்.

திருக்குறளின் பெருமை குறித்து சட்டப்பேரவையில் முதலமைச்சர் முன்மொழிந்த தீர்மானம் குறித்தும் அவர் தனது கருத்தைப் பதிவு செய்துள்ளார். முதலமைச்சர் இப்போதுதான் திருக்குறளின் பெருமையைப் பற்றிப் பேசுகிறார், ஆனால் உண்மையில் திருக்குறளின் சிறப்புகளை உலக அரங்கிற்குப் பலமுறை எடுத்துச் சென்று தமிழர்களுக்குப் பெருமை சேர்த்தவர் நமது பிரதமர் நரேந்திர மோடிதான் என்பதை அவர் பெருமையுடன் நினைவு கூர்ந்துள்ளார்.

மேலும், புதிய கல்விக் கொள்கை குறித்த விமர்சனங்களுக்கும் அவர் பதிலளித்துள்ளார். மத்திய அரசு கொண்டுவந்துள்ள புதிய கல்விக் கொள்கையானது மாநில தாய்மொழிகளுக்கு அதிக முக்கியத்துவமும் முன்னுரிமையும் அளிக்கும் வகையிலேயே உருவாக்கப்பட்டுள்ளது என்று அவர் தெரிவித்துள்ளார். ஆனால், இந்த உண்மையை முழுமையாக ஆராயாமல், தமிழகத்தில் அத்திட்டம் குறித்து முற்றிலும் தவறாகப் புரிந்து கொள்ளப்பட்டுள்ளதாக தமிழிசை சவுந்தரராஜன் தனது பதிவில் குறிப்பிட்டுள்ளார்.