“சாதியையும் மதத்தையும் வீட்டுக்குள்ளேயே பூட்டியாச்சு…” ‘இந்து விரோதி’ விமர்சனங்களுக்கு அண்ணாமலை கொடுத்த மரண மாஸ் பதிலடி… தமிழக அரசியலில் அடுத்த பரபரப்பு…!

கோவை மாவட்டம் பொள்ளாச்சியில் நடைபெற்ற ‘We The Leaders’ விழிப்புணர்வு மாநாட்டில் கலந்துகொண்டு பேசிய தமிழக அரசியல் தலைவர் அண்ணாமலை, தனது மதம் மற்றும் சாதி குறித்த நிலைப்பாட்டை வெளிப்படையாகப் பகிர்ந்துள்ளார். “நான் ஒரு இந்து. ஆனால், வீட்டில் இருந்து வெளியே வரும்போது, மதத்தையும் சாதியையும் வீட்டினுள்ளே வைத்து பூட்டிவிட்டு, ஒரு சாமான்யனாக, அனைவருக்கும் பொதுவானவனாகவே மக்கள் முன் வருகிறேன்” என்று அவர் குறிப்பிட்டார். மதத்தை ஒவ்வொரு முறையும் தூக்கிப் பிடிக்க வேண்டிய அவசியமில்லை என்றும், உண்மையான இந்து அனைவரையும் சமமாகவே பார்ப்பான் என்றும் அவர் வலியுறுத்தினார். மேலும், கரூரில் உள்ள கோயில் இனாம் நில விவகாரத்தில் தவெக அரசுக்கு ஆதரவாகப் பேசியதற்காகத் தம்மைக் ‘இந்து விரோதி’ என விமர்சிப்பவர்களுக்குப் பதிலடி கொடுத்த அவர், விஜயநகர பேரரசு காலம் தொட்டே கோயிலில் பணிபுரிபவர்களுக்கு இனாம் நிலம் வழங்குவதுதான் வழக்கம் என்றும், இதற்கு முன்பு எச். ராஜா மற்றும் எடப்பாடி பழனிசாமி ஆகியோர் இதே கருத்தைக் குறிப்பிட்டபோது அவர்கள் இந்து விரோதியாகத் தெரியவில்லை என்றும் சுட்டிக்காட்டினார்.

இம்மாநாட்டில் சமூக நலம் சார்ந்த ஆறு முக்கிய தீர்மானங்களும் நிறைவேற்றப்பட்டன. குறிப்பாக, “போதைப்பொருள் பயன்படுத்த மாட்டேன், யாரையும் பயன்படுத்த விட மாட்டோம்” என்ற உறுதிமொழியோடு, கல்வி நிலையங்கள் மற்றும் கோயில்கள் அருகே உள்ள டாஸ்மாக் கடைகளை மூட வேண்டும், காலை நேரக் கள்ளச்சந்தை மது விற்பனையைத் தடுக்க வேண்டும், மற்றும் மாவட்டந்தோறும் போதைப்பொருள் தடுப்புத் திட்டங்களை உருவாக்க வேண்டும் போன்ற கோரிக்கைகள் முன்வைக்கப்பட்டன. அத்துடன் புதிய பார்களுக்கு அனுமதி வழங்கக் கூடாது, தற்போதுள்ள மறுவாழ்வு மையங்களைச் சீரமைக்க வேண்டும், மற்றும் விதிமீறல்களில் ஈடுபடும் பார்கள் மீது கடுமையான நடவடிக்கை எடுக்க வேண்டும் ஆகிய தீர்மானங்களும் இந்த மாநாட்டில் ஒருமனதாக நிறைவேற்றப்பட்டன.