“முதலுக்கே மோசம் வந்துடும் போலயே”… பவர் சென்டர் செந்தில் பாலாஜிக்கு கொங்குவில் ஆப்பு…. செம ஷாக்கில் ஸ்டாலின்…..!

2026 சட்டமன்றத் தேர்தலை முன்னிட்டு, கொங்கு மண்டலத்தின் பொறுப்பாளராக அமைச்சர் செந்தில் பாலாஜி நியமிக்கப்பட்டுள்ளார். நீலகிரி, கோவை, ஈரோடு, திருப்பூர், நாமக்கல் மற்றும் கரூர் ஆகிய ஆறு மாவட்டங்களில் திமுக மற்றும் அதன் கூட்டணி கட்சிகளை வெற்றி பெற வைக்கும் பொறுப்பு அவரிடம் ஒப்படைக்கப்பட்டுள்ளது. கடந்த கால தேர்தல்களில் தனது சிறப்பான களப்பணியால் திமுகவிற்கு ஏறுமுகத்தை ஏற்படுத்திக் கொடுத்த செந்தில் பாலாஜி, இந்த முறையும் தலைமையின் நம்பிக்கையை காப்பாற்ற தீவிரமாகச் செயல்பட்டு வருகிறார்.

இருப்பினும், கோவையில் செந்தில் பாலாஜியின் செயல்பாடுகள் அக்கட்சியின் உள்ளூர் நிர்வாகிகள் மத்தியில் அதிருப்தியை ஏற்படுத்தியுள்ளது. குறிப்பாக, கோவையில் களமிறங்கியுள்ள செந்தில் பாலாஜியின் ‘கரூர் டீம்’, உள்ளூர் திமுக நிர்வாகிகளின் கருத்துகளை மதிப்பதில்லை என்ற குற்றச்சாட்டு எழுந்துள்ளது. இதனால், தங்கள் சொந்த மண்ணிலேயே வெளி மாவட்ட ஆட்களின் ஆதிக்கம் இருப்பதாகக் கருதும் கோவை திமுகவினர் மன உளைச்சலில் இருப்பதாகக் கூறப்படுகிறது.

இந்த உட்கட்சி விவகாரத்தில், முன்னாள் எம்எல்ஏ நா. கார்த்திக் உள்ளிட்ட முக்கிய நிர்வாகிகள் செந்தில் பாலாஜியின் செயல்பாடுகளுக்கு ஒத்துழைப்பு அளிக்கத் தயக்கம் காட்டுவதாகவும், இது கட்சிப் பணிகளில் முட்டுக்கட்டையாக இருப்பதாகவும் தகவல்கள் தெரிவிக்கின்றன. கொங்கு மண்டலத்தில் தமக்கான முக்கியத்துவமும் அங்கீகாரமும் குறைகிறதோ என்ற அச்சமும், உள்ளூர் நிர்வாகிகளிடையே கோபத்தை ஏற்படுத்தியுள்ளது.

கோவையில் அதிமுக மற்றும் பாஜக வலுவாக உள்ள சூழலில், இதுபோன்ற உட்கட்சிப் பூசல்கள் திமுகவின் வெற்றி வாய்ப்பை பாதிக்கும் என அரசியல் நோக்கர்கள் எச்சரிக்கின்றனர். செந்தில் பாலாஜி, உள்ளூர் நிர்வாகிகளைச் சரிக்கட்டி, அவர்களுக்கான உரிய மரியாதையையும் அங்கீகாரத்தையும் உறுதி செய்யாவிட்டால், இலக்கை எட்டுவது சவாலான காரியமாகவே இருக்கும் என்பதே கள நிலவரமாக உள்ளது.