தமிழகம் இனி முதியோர் தேசம்…? அடுத்த சில ஆண்டுகளில் வரப்போகும் பேரதிர்ச்சி… மாநில அரசும் மக்களும் தப்பிக்க வழி என்ன…?!

தமிழக அரசு அண்மையில் வெளியிட்ட வெள்ளை அறிக்கையின்படி, இந்தியாவின் மற்ற பெரிய மாநிலங்களை விடத் தமிழகத்தில் முதியோர்களின் எண்ணிக்கை மிக வேகமாக அதிகரித்து வருகிறது. கடந்த 2011-ல் 10.6 சதவீதமாக இருந்த முதியோர்களின் எண்ணிக்கை, வரும் 2031-ஆம் ஆண்டுக்குள் 18.2 சதவீதமாக உயரும் என மதிப்பிடப்பட்டுள்ளது. இது தேசிய சராசரி வளர்ச்சியான 56 சதவீதத்தை விட மிக அதிகமாக, அதாவது 71.7 சதவீத வளர்ச்சி விகிதத்தைக் கொண்டுள்ளதால், எதிர்காலத்தில் தமிழகம் ‘முதியோர் தேசம்’ என்ற நிலையை நோக்கி நகர்வதாக இந்த அறிக்கை எச்சரிக்கிறது.

இத்தகைய மக்கள் தொகை மாற்றத்தால், நாட்டின் பொருளாதார வளர்ச்சிக்கு வித்திடும் உழைக்கும் பிரிவினரின் எண்ணிக்கை வரும் 2036-க்குள் 63.6 சதவீதமாகக் குறையும் வாய்ப்புள்ளது. இதனால் வரி செலுத்துவோர் எண்ணிக்கை குறைந்து அரசின் வருவாய் சரியக்கூடும். அதே நேரத்தில், உழைக்கும் ஒரு சிறிய பிரிவினர், தங்களைச் சார்ந்திருக்கும் பெரிய அளவிலான முதியோர்கள் மற்றும் குழந்தைகளைப் பராமரிக்க வேண்டிய சமூக அழுத்தத்திற்கும், பொருளாதார நெருக்கடிக்கும் ஆளாக நேரிடும்.

முதியோர் எண்ணிக்கை அதிகரிக்கும் போது, அரசு தனது உள்கட்டமைப்பு மற்றும் வளர்ச்சித் திட்டங்களுக்கான மூலதனச் செலவுகளைக் குறைத்து, அவர்களின் பாதுகாப்பு, மருத்துவம் மற்றும் நலத்திட்டங்களுக்கு கூடுதல் நிதி ஒதுக்க வேண்டிய கட்டாயம் ஏற்படும். எனவே, முதியோர்களுக்கான பிரத்யேக மருத்துவக் காப்பீடுகள், முதியோர் இல்லங்கள் மற்றும் ஓய்வூதியத் திட்டங்களை அரசு தற்போதே தொலைநோக்குப் பார்வையுடன் திட்டமிட்டுச் செயல்படுத்த வேண்டும். முதியோர்களைச் சுமையாகப் பார்க்காமல், அவர்களின் அனுபவங்களைச் சமூக மேம்பாட்டிற்குப் பயன்படுத்தும் உத்திகளையும் அரசு உருவாக்க வேண்டும்.