“CM-க்கு ஒரு நீதி.. சீமானுக்கு ஒரு நீதியா?”…. தமிழக காவல்துறையை வெளுத்து வாங்கிய உயர்நீதிமன்றம்….!

நாம் தமிழர் கட்சியின் தலைமை ஒருங்கிணைப்பாளர் சீமான் குறித்து இணையதளங்களில் அவதூறு பரப்புவோர் மீது நடவடிக்கை எடுக்கக் கோரி அக்கட்சியைச் சேர்ந்த தீரன் திருமுருகன் தாக்கல் செய்த மனுவை சென்னை உயர்நீதிமன்ற மதுரை கிளை அண்மையில் விசாரித்தது. அப்போது, “முதலமைச்சர் குறித்து அவதூறாகப் பேசிய விவகாரத்தில் உடனடியாக வழக்குப்பதிவு செய்து கைது நடவடிக்கை மேற்கொள்ளும் தமிழகக் காவல்துறை, சீமான் குறித்து அவதூறு மற்றும் அசிங்கமாகப் பேசப்படும்போது ஏன் நடவடிக்கை எடுப்பதில்லை?” என்று நீதிபதி விக்டோரியா கெளரி கடுமையான கேள்விகளை எழுப்பினார். மேலும், காவல்துறை ஒருதலைப்பட்சமாகச் செயல்படுவதைச் சகித்துக் கொள்ள முடியாது என்றும், சீமான் தமிழக அரசியலில் தவிர்க்க முடியாத ஒரு தலைவர் என்றும் கருத்து தெரிவித்த நீதிபதி, அரசியல் தலைவர்களைத் தரக்குறைவாகச் சித்தரிப்பதை வேடிக்கை பார்க்க முடியாது எனச் சாடினார்.

இந்த வழக்கின் தீவிரத்தைக் கருத்தில் கொண்டு, சீமான் தொடர்பாக இணையத்தில் பதிவிடப்பட்டுள்ள மார்பிங் செய்யப்பட்ட புகைப்படங்கள் மற்றும் அவதூறு வீடியோக்களை இன்றைக்குள்ளேயே அகற்றி, அது குறித்து வழக்குப் பதிவு செய்து அறிக்கை தாக்கல் செய்ய மதுரை மாவட்ட சைபர் கிரைம் ஆய்வாளருக்கு உயர்நீதிமன்ற கிளை அதிரடி உத்தரவிட்டுள்ளது. மேலும், இந்த விவகாரத்தில் தொடர்புடைய யூடியூபர்களான பிஸ்மி மற்றும் தமிழன் கோகுல் ஆகியோர் மீது உடனடியாக வழக்குப் பதிவு செய்து, எடுக்கப்பட்ட நடவடிக்கைகள் குறித்து நீதிமன்றத்தில் அறிக்கை சமர்ப்பிக்க வேண்டும் என்றும் நீதிபதி உத்தர பிறப்பித்து உத்தரவிட்டுள்ளார்.