“பிணம் அவர்களே நீங்களாவது நடவடிக்கை எடுங்க…!” சுடுகாட்டில் பெட்டிஷன் கொடுத்த சுரேஷ்குமார்…. அதிரவைக்கும் பின்னணி…!!

திருப்பத்தூர் மாவட்டத்தைச் சேர்ந்த பாஜக பிரமுகரும் சமூக ஆர்வலருமான சுரேஷ்குமார், அரசு அதிகாரிகளின் மெத்தனப் போக்கைக் கண்டித்து சுடுகாட்டில் பிணத்திடம் மனு கொடுத்துப் பரபரப்பை ஏற்படுத்தியுள்ளார். சாலை அமைப்பதில் நடந்த ஊழல், கனிம வளக் கொள்ளை மற்றும் அரசுச் சொத்துக்கள் விற்பனை செய்யப்பட்டது தொடர்பாகப் பலமுறை மாவட்ட ஆட்சியரிடம் அவர் புகாரளித்துள்ளார். ஆனால், அந்த மனுக்கள் மீது அதிகாரிகள் எந்தவொரு மேல்நடவடிக்கையும் எடுக்காமல் அலட்சியம் காட்டியதால் ஆத்திரமடைந்த அவர், இந்த வினோதப் போராட்டத்தைக் கையில் எடுத்துள்ளார்.

துரைநகர் பகுதியில் உள்ள மயானத்திற்குச் சென்ற சுரேஷ்குமார், அங்குப் புதைக்கப்பட்டிருந்த ஒருவரது உடலிடம் தனது கோரிக்கை மனுவைச் சமர்ப்பித்து, “பிணம் அவர்களே, நீங்களாவது நடவடிக்கை எடுங்கள்” என்று முறையிட்டார். உயிரோடு இருக்கும் அதிகாரிகளுக்குப் பலமுறை மனு அளித்தும் பயனில்லாததால், வேறு வழியின்றித் தனது ஆதங்கத்தை வெளிப்படுத்த இவ்வாறு செய்ததாக அவர் தெரிவித்தார். அதிகாரிகளின் செயல்பாடற்ற தன்மையை விமர்சிக்கும் வகையில் அமைந்த இவரது இந்தச் செயல், தற்போது அப்பகுதி மக்களிடையே பெரும் விவாதப் பொருளாக மாறியுள்ளது.