“என் சாவுக்கு டீச்சர் தான் காரணம்”… தீயில் கருகிய 9 ஆம் வகுப்பு மாணவியின் கடைசி வீடியோ… பரபரப்பு வாக்குமூலம்…!

கோவை வால்பாறை அருகே ஆசிரியர்கள் திட்டியதால் உடலில் தீ வைத்துக் கொண்ட 9 ஆம் வகுப்பு மாணவி சிகிச்சை பலனின்றி உயிரிழந்த நிலையில் மூன்று ஆசிரியர்கள் மீது வழக்குப்பதிவு செய்ய சிறுமியின் பெற்றோர் கோரிக்கை விடுத்து உடலை வாங்க மறுத்ததால் பரபரப்பு ஏற்பட்டுள்ளது. கோவை மாவட்டம் வால்பாறையை சேர்ந்த சக்திவேல் குமரன் என்பவருடைய மூத்த மகள் முத்து சஞ்சனா. ரெட்டி கடை பகுதியில் உள்ள அரசு உயர்நிலைப் பள்ளியில் 9 ஆம் வகுப்பு படித்து வருகின்றார். இந்நிலையில் கடந்த அக்டோபர் பத்தாம் தேதி பள்ளி முடிந்து வீட்டுக்கு வந்த மாணவி முத்து சஞ்சனா உடலில் மண்ணெண்ணையை ஊற்றி தற்கொலைக்கு முயன்றார். உடனே அக்கம் பக்கத்தினர் அவரை மீட்டு அருகில் உள்ள மருத்துவமனையில் சிகிச்சைக்காக அனுமதித்த நிலையில் சுமார் 40 நாட்களுக்கு மேலாக சிகிச்சையில் இருந்த மாணவி சிகிச்சை பலன் இன்றி உயிரிழந்தார்.

இதனிடையே மாணவி தான் தற்கொலைக்கு முயன்றது குறித்து வாக்குமூலம் அளித்துள்ளார். அதில், தான் படிக்கும் பள்ளியில் பணியாற்றி வரும் அறிவியல் ஆசிரியர் சிந்தியா, தமிழ் ஆசிரியர் ராணி பாய், ஆங்கில ஆசிரியர் சியாமளாதேவி ஆகியோர் சக மாணவர்கள் முன்பு திட்டியதால் மன உளைச்சலில் இருந்ததாகவும் அதனால் தற்கொலைக்கு முயன்றதாகவும் கூறியுள்ளார். இந்நிலையில் தொடர் சிகிச்சையில் இருந்த மாணவி நேற்று உயிரிழந்த நிலையில் மகளை தற்கொலைக்கு தூண்டிய ஆசிரியர்கள் மீது வழக்கு பதிவு செய்ய கோரி பெற்றோர்கள் உடலை வாங்க மறுப்பு தெரிவித்துள்ளனர். இந்த சம்பவம் அங்கு பெரும் பரபரப்பையும் அதிர்ச்சியையும் ஏற்படுத்தி உள்ளது.