அச்சோ… ஐஏஎஸ் அதிகாரிகளுக்குக் கடும் கட்டுப்பாடு… கூடுதல் வாகனங்களை உடனடியாக… ஒப்படைக்கத் தமிழக அரசு உத்தரவு…!

தமிழக அரசுத் துறைகளில் பணியாற்றும் ஐஏஎஸ் அதிகாரிகள் மற்றும் உயர் அதிகாரிகளின் தேவையற்ற வாகனப் பயன்பாட்டைக் கட்டுப்படுத்தவும், அரசின் நிதி இழப்பைத் தவிர்க்கவும் தலைமைச் செயலகம் புதிய அரசாணையைப் பிறப்பித்துள்ளது. இதன்படி, ஐஏஎஸ் அதிகாரிகள் பொதுத் துறை மூலம் ஒதுக்கப்பட்ட ஒரே ஒரு சொகுசு வாகனத்தை மட்டுமே பயன்படுத்த வேண்டும் என்றும், அலுவலகங்கள் மற்றும் வீடுகளில் பயன்பாட்டில் உள்ள கூடுதல் வாகனங்களை உடனடியாக ஒப்படைக்க வேண்டும் என்றும் உத்தரவிடப்பட்டுள்ளது. இதன் தொடர்ச்சியாகச் சென்னையில் உள்ள முக்கிய அரசு வளாகங்களில் அதிகாரிகள் தங்களின் கூடுதல் வாகனங்களை வரிசையாக ஒப்படைக்கத் தொடங்கியுள்ளனர்.

தமிழகத்தில் உள்ள 41 அரசுத் துறைகளில் 15,000-க்கும் மேற்பட்ட வாகனங்கள் உள்ளன. சமீபத்தில் நடத்தப்பட்ட ரகசிய விசாரணையில், பல மூத்த அதிகாரிகள் தங்களுக்கு ஒதுக்கப்பட்ட வாகனங்களைத் தாண்டி, துறை சார்ந்த 4 வாகனங்கள் வரை தங்களது சொந்த பயன்பாட்டிற்கும் உதவியாளர்களுக்கும் சட்டவிரோதமாகப் பயன்படுத்தி வந்தது தெரியவந்துள்ளது. மேலும், ஓடாத வாகனங்களுக்குப் போலி கணக்கு காட்டி எரிபொருள் படிகளில் லட்சக்கணக்கில் முறைகேடு செய்யப்பட்டுள்ளதும் கண்டறியப்பட்டுள்ளது. தற்சமயம் எரிபொருளுக்காக மட்டும் மாதம் ரூ.25 கோடி செலவிடப்பட்டு வரும் நிலையில், இக்கட்டுப்பாடுகள் மூலம் செலவைக் குறைக்க நடவடிக்கை எடுக்கப்பட்டுள்ளது.

சமீபத்தில் நடந்த சட்டமன்றத் தேர்தலில் தவெக வெற்றி பெற்று, அதன் தலைவர் விஜய் முதலமைச்சராகப் பொறுப்பேற்றதைத் தொடர்ந்து, நிர்வாகத்தில் பல்வேறு அதிரடி மாற்றங்கள் மேற்கொள்ளப்பட்டு வருகின்றன. இப்புதிய நிர்வாக நடவடிக்கையின் ஒரு பகுதியாகவே இந்த வாகனக் கட்டுப்பாடுகளும் விதிக்கப்பட்டுள்ளன. மேலும், வருவாய், ஊரக வளர்ச்சி, நகராட்சி நிர்வாகம், நீர்வளம், பொதுப்பணி மற்றும் நெடுஞ்சாலை போன்ற முக்கியத் துறைகளில் பணிபுரியும் ஐஏஎஸ் அல்லாத பிற உயர் அதிகாரிகளிடம் உள்ள வாகனங்கள் குறித்தும் முழு விவரங்களைக் கேட்டு விசாரணையை அரசு விரிவுபடுத்தியுள்ளது.