“ஆட்சியில் பங்கு கிடையாது.. ஆனா இது உண்டு”…. காங்கிரஸுக்கு ஸ்டாலின் போட்ட ‘லட்சுமண ரேகை’… டெல்லி அதிர்ச்சி…!

தமிழகத்தில் 2026 சட்டமன்றத் தேர்தல் களம் சூடுபிடித்துள்ள நிலையில், திமுக கூட்டணியில் காங்கிரஸைத் தக்கவைத்துக்கொள்ள முதலமைச்சர் மு.க.ஸ்டாலின் புதிய வியூகம் ஒன்றை வகுத்துள்ளார். நடிகர் விஜய்யின் தமிழக வெற்றிக் கழகம், காங்கிரஸிற்கு 100 தொகுதிகள் மற்றும் துணை முதலமைச்சர் பதவி உள்ளிட்ட அதிரடி சலுகைகளை வழங்க முன்வந்துள்ளதாகத் தகவல்கள் பரவி வருகின்றன. இந்தச் சூழலில், ராகுல் காந்தியின் தலைமையிலான காங்கிரஸ் கட்சி மாற்று முடிவுகளை எடுப்பதைத் தவிர்க்கும் வகையில், திமுக தனது தரப்பிலிருந்து ஒரு சமரசத் திட்டத்தை முன்வைத்துள்ளது.

இந்த புதிய திட்டத்தின்படி, காங்கிரஸிற்கு அமைச்சரவையில் இடமளிக்க முடியாது என்ற தனது நிலையில் திமுக உறுதியாக இருந்தாலும், அவர்களுக்கு அதிகாரப் பகிர்வு வழங்க முன்வந்துள்ளது. சட்டமன்றத்தின் கௌரவமிக்க பதவியான ‘துணைச் சபாநாயகர்’ பதவியை காங்கிரஸிற்கு வழங்க ஸ்டாலின் முன்வந்துள்ளார். அத்துடன், செல்வாக்குமிக்க 5 அரசு வாரியத் தலைவர்கள் பதவிகள் மற்றும் பல்கலைக்கழக சிண்டிகேட் உறுப்பினர் பதவிகளில் குறிப்பிட்ட சதவீத இடங்களை வழங்கவும் திமுக தரப்பில் தூது அனுப்பப்பட்டுள்ளது. இதன் மூலம் ஆட்சியில் பங்கு இல்லாவிட்டாலும், அரசு நிர்வாகத்தில் காங்கிரஸிற்கு முக்கியத்துவம் அளிக்கப்படும் என்பது உறுதி செய்யப்பட்டுள்ளது.

திமுகவின் இந்தச் சலுகை ஒருபுறம் இருந்தாலும், காங்கிரஸிற்கு 25 முதல் 30 தொகுதிகள் வரை மட்டுமே ஒதுக்கப்படும் என்பதில் திமுக தெளிவான எல்லைக்கோட்டை வகுத்துள்ளது. விஜய்யின் தவெக வழங்கும் ‘துணை முதலமைச்சர்’ என்ற கவர்ச்சிகரமான வாக்குறுதியையா அல்லது திமுக வழங்கும் இந்த ‘நிச்சயமான அதிகாரத்தையா’ எதைத் தேர்ந்தெடுப்பது என்ற குழப்பத்தில் காங்கிரஸ் தலைமை உள்ளது. திராவிடக் கட்சிகளின் தனிப்பெரும் பெரும்பான்மை என்ற கொள்கையில் சமரசம் செய்யாமல், அதே சமயம் கூட்டணிக் கட்சியைத் தக்கவைக்கும் ஸ்டாலினின் இந்த நகர்வு தமிழக அரசியலில் பெரும் எதிர்பார்ப்பை ஏற்படுத்தியுள்ளது.