இபிஎஸ் போட்ட அந்த ஒரு ‘ரகசிய’ உத்தரவு… பதறிப்போன வேலுமணி தரப்பு… அதிமுகவில் நள்ளிரவு பரபரப்பு…!

தமிழக சட்டமன்ற தேர்தல் முடிவுகள் மாநில அரசியலில் யாரும் எதிர்பாராத பல அதிரடி திருப்பங்களை ஏற்படுத்தியுள்ளன. இந்தத் தேர்தலில் எந்தவொரு தனிக்கட்சிக்கும் முழுமையான பெரும்பான்மை கிடைக்காத நிலையில், 108 தொகுதிகளில் வெற்றி பெற்ற தமிழக வெற்றிக் கழகம் (தவெக), பிற கூட்டணிக் கட்சிகளின் ஆதரவோடு புதிய ஆட்சியை அமைத்துள்ளது. மறுபுறம், தமிழகத்தின் பிரதான எதிர்க்கட்சியாக இருந்த அதிமுக, இந்தத் தேர்தலில் எதிர்பாராத பின்னடைவைச் சந்தித்து 3-வது இடத்திற்கு தள்ளப்பட்டுள்ளது. இந்தத் தேர்தல் தோல்வியானது அதிமுகவிற்குள் இருக்கும் உட்கட்சி பூசலை மீண்டும் விஸ்வரூபம் எடுக்க வைத்துள்ளதோடு, கட்சி பிளவை நோக்கியும் நகர்த்தி வருகிறது.

சட்டமன்றத்தில் அண்மையில் நடந்த புதிய அரசின் நம்பிக்கை வாக்கெடுப்பில், அதிமுகவின் முன்னாள் அமைச்சர் எஸ்.பி. வேலுமணியின் ஆதரவு எம்.எல்.ஏ-க்கள் தவெக அரசுக்கு ஆதரவாக வாக்களித்தது அரசியல் வட்டாரத்தில் பெரும் அதிர்ச்சியை ஏற்படுத்தியது. இந்த நிகழ்வைத் தொடர்ந்து, அதிமுக பொதுச்செயலாளர் எடப்பாடி பழனிசாமி மற்றும் வேலுமணி அணிகளுக்கு இடையேயான மோதல் உச்சக்கட்டத்தை எட்டியுள்ளது. தேர்தல் தோல்விக்கான காரணங்களை ஆராயவும், கட்சியின் அடுத்தகட்ட நகர்வுகள் குறித்து விவாதித்து நல்ல முடிவு எடுக்கவும் உடனடியாக அதிமுக பொதுக்குழுவை கூட்ட வேண்டும் என்று வேலுமணி அணி தீவிரமாக காய் நகர்த்தி வருகிறது.

பொதுக்குழுவைக் கூட்டுவதற்காக மாவட்ட செயலாளர்கள், பொதுக்குழு மற்றும் செயற்குழு உறுப்பினர்கள் உள்ளிட்ட பல்வேறு முக்கிய நிர்வாகிகளை வேலுமணி அணியினர் நேரில் சந்தித்து ஆதரவு கோரி வருவதுடன், அதற்கான விருப்பக் கடிதத்தில் கையெழுத்துகளையும் வாங்கி வருகின்றனர். எடப்பாடி பழனிசாமி பொதுச்செயலாளர் பதவிக்கு தகுதியற்றவர் என்கிற விமர்சனத்தை வேலுமணி, சி.வி. சண்முகம், நத்தம் விஸ்வநாதன் ஆகியோர் ஏற்கனவே முன்வைத்து வரும் நிலையில், இந்தப் பொதுக்குழு கூட்டப்பட்டால் இபிஎஸ்-ஸின் பதவியைப் பறிப்பதற்கும், அவருக்கு கடுமையான நெருக்கடிகளைக் கொடுப்பதற்கும் வேலுமணி தரப்பு திட்டமிட்டுள்ளதாகக் கூறப்படுகிறது.

எதிரணித் தலைவர்களின் இந்த வியூகத்தை உடைக்க எடப்பாடி பழனிசாமியும் தற்போது அதிரடிப் போர்க்களத்தில் இறங்கியுள்ளார். வேலுமணி தரப்பினருக்கு எந்த இடத்திலும் தளம் அமைத்துக் கொடுத்துவிடக் கூடாது என்பதில் உறுதியாக இருக்கும் இபிஎஸ், தனது ஆதரவாளர்களுடன் அவசர ஆலோசனைக் கூட்டம் ஒன்றை நடத்தியுள்ளார். அந்தக் கூட்டத்தில், “வேலுமணி அணியினர் பொதுக்குழுவிற்காக உங்களிடம் வந்து கையெழுத்து கேட்டால், யாரும் எக்காரணம் கொண்டும் கையெழுத்துப் போடக் கூடாது” என்று தனது ஆதரவாளர்களுக்கு அழுத்தமான குரலில் மிக முக்கிய உத்தரவைப் பிறப்பித்துள்ளார். இதனால் அதிமுகவில் அதிகாரத்தைக் கைப்பற்றுவதற்கான உட்கட்சிப் போர் தற்போது உச்சகட்டப் பரபரப்பை எட்டியுள்ளது.