அதிமுகவில் அதிரடி திருப்பம்… எஸ்பி வேலுமணி தான் எனக்கு தலைவர்.. எடப்பாடிக்கு ஷாக் கொடுத்த கேசி வீரமணி…!

அதிமுகவில் உட்கட்சி பூசல் மற்றும் அணிகள் மோதல் உச்சகட்டத்தை எட்டியுள்ள நிலையில், முன்னாள் அமைச்சர் எஸ்.பி. வேலுமணி அணியில் இருந்த ஜோலார்பேட்டை எம்.எல்.ஏ கே.சி.வீரமணி, எடப்பாடி பழனிச்சாமி (ஈபிஎஸ்) அணிக்கு மாறிவிட்டதாகத் தகவல் பரவியது. சமீபத்தில் திருப்பத்தூர் மாவட்டச் செயலாளர் பதவியிலிருந்து வீரமணி நீக்கப்பட்டு, அவருக்குப் பதில் பசுபதி நியமிக்கப்பட்டதைத் தொடர்ந்து இந்த ஊகம் வலுப்பெற்றது. ஈபிஎஸ் அணியில் 22 எம்.எல்.ஏ-க்களும், சி.வி. சண்முகம் மற்றும் எஸ்.பி. வேலுமணி தலைமையிலான அணியில் 25 எம்.எல்.ஏ-க்களும் செயல்பட்டு வருவதாகக் கூறப்படும் நிலையில், இந்த இடமாற்றம் அதிமுக அரசியலில் பெரும் திருப்பமாகப் பார்க்கப்பட்டது.

இந்தத் தகவல்களுக்கு முற்றுப்புள்ளி வைக்கும் விதமாக கே.சி.வீரமணி தற்போது நேரடி விளக்கம் அளித்துள்ளார். தான் அணி மாறியதாக வெளியாகும் செய்திகள் முற்றிலும் உண்மைக்குப் புறம்பானவை என்று மறுத்துள்ள அவர், தாங்கள் இன்னும் சி.வி. சண்முகம் மற்றும் எஸ்.பி. வேலுமணி தலைமையிலான அணியிலேயே நீடிப்பதாகத் திட்டவட்டமாகத் தெரிவித்துள்ளார். மேலும், “கழகத்தின் பொதுச்செயலாளர் எடப்பாடியார் தான் என்பதில் மாற்றுக்கருத்து இல்லை, ஆனால் தற்போது நாங்கள் வேலுமணி தலைமையில்தான் செயல்படுகிறோம்” எனக் கூறி குழப்பங்களுக்குத் திரை போட்டுள்ளார்.

முன்னதாக, தவெக (தமிழக வெற்றிக் கழகம்) கட்சிக்கு அதிமுகவின் ஒரு பகுதியினர் ஆதரவு அளிப்பதாக எழுந்த சர்ச்சைக்கும் அவர் பதிலளித்துள்ளார். சபாநாயகரிடம் தவெக-விற்கு ஆதரவு தெரிவித்தது உண்மைதான் என்றும், அதில் எந்த மாற்றமும் இல்லை என்றும் அவர் குறிப்பிட்டுள்ளார். சில ஊடகங்கள் செய்திகளைத் திரித்துக் கூறுவதாகவும், தங்களின் நிலைப்பாட்டில் தாங்கள் உறுதியாக இருப்பதாகவும் அவர் செய்தியாளர்களிடம் பேசியுள்ளார். இதன் மூலம் வேலுமணி அணியின் பலம் குறையவில்லை என்பது மீண்டும் உறுதிப்படுத்தப்பட்டுள்ளது.

இருப்பினும், தனது ஆதரவாளர்களுடனான ஆலோசனைக் கூட்டத்தில் கே.சி.வீரமணி உருக்கமாகப் பேசியதுதான் இத்தனை விவாதங்களுக்கும் காரணமாக அமைந்தது. தொகுதி மக்களின் நலனுக்காகவும், சில நிர்ப்பந்தங்கள் காரணமாகவும் ஆளும் கட்சியான தவெக-விற்கு ஆதரவு அளிக்க வேண்டிய சூழல் ஏற்பட்டதாக அவர் அப்போது கூறியிருந்தார். அந்தப் பேச்சின் இறுதியில், “என்றும் எனது பொதுச்செயலாளர் எடப்பாடி பழனிச்சாமி தான்” என்று அவர் குறிப்பிட்டதாலேயே, அவர் மீண்டும் ஈபிஎஸ் பக்கம் சாய்ந்துவிட்டதாகத் தகவல்கள் கசிந்தன. தற்போது அதற்கு அவரே விளக்கம் அளித்ததன் மூலம் அதிமுகவில் நிலவி வந்த ஒரு கட்ட வதந்திகள் ஓய்ந்துள்ளன.