கடத்தல் மன்னன் கேரக்டரில் நடிகர் விஜய்சேதுபதி நடித்த படம்… ரி ரிலீஸ் தேதி அறிவிப்பு… – உற்சாகத்தில் மக்கள் செல்வன் ரசிகர்கள்!

நடிகர் விஜய் சேதுபதி வளரும் நடிகராக இருந்த காலகட்டத்தில் அவர் நடித்த சில படங்கள் அவருக்கு பெரிய அளவில் ரசிகர்களிடம் வரவேற்பை பெற்று தந்தன. அதில் ஒரு படம் தான் சூது கவ்வும். இயக்குனர் நலன் குமாரசாமி இயக்கத்தில் நடிகர் விஜய் சேதுபதி நடித்த இந்த படம் கடந்த 2013ம் ஆண்டில் வெளியாகி வெற்றி பெற்றது. இந்த படத்தில் விஜய் சேதுபதி சஞ்சிதா ஷெட்டி அசோக் செல்வன் ரமேஷ் திலக் கருணாகரன் பாபி சிம்ஹா எம்எஸ் பாஸ்கர் உள்ளிட்டோர் முக்கிய கேரக்டர்களில் நடித்திருந்தனர்.

ஆள் கடத்தல் கும்பல் கதைக்களத்தில் காமெடியான பாணியில் இந்த படம் இருந்தது. இதில் வந்த டார்க் காமெடி காட்சிகள் பெரிய அளவில் வரவேற்பை பெற்றது. இந்த படம் கல்ட் கிளாசிக் படமாகவும் மாறியது. இதைத் தொடர்ந்து சூது கவ்வும் 2 – நாடும் நாட்டு மக்களுக்கும் என்ற 2ம் பாகம் படம் கடந்த 2024ம் ஆண்டு எம்எஸ் அர்ஜூன் இயக்கத்தில் வெளியானது. இந்த படத்தில் மிர்ச்சி சிவா ஹீரோவாக நடித்திருந்தார்.

ஆனால் இந்த படம் எதிர்பார்த்த அளவுக்கு போகவில்லை. தமிழ் சினிமாவில் கல்ட் கிளாசிக் படங்கள் தற்போது வரிசையில் வருவதால் சூது கவ்வும் முதல் பாகம் படம் ரி ரிலீஸ் செய்யப்படுகிறது. வருகிற 20-ஆம் தேதி சூது கவ்வும் படம் ரி ரீலீஸ் செய்யப்படுகிறது. இந்த படத்துக்கான டிக்கெட் கட்டணம் 100 ரூபாய் என்றும் நிர்ணயம் செய்யப்பட்டுள்ளது.