பொது இடத்தில் இப்படியா..? கார் ஓட்டுநரைத் தாக்க தனது சொந்தத் தாயையே நடுரோட்டில் தள்ளிவிட்ட மகன்… கொந்தளிக்க வைத்த வீடியோ..!!

பெங்களூருவின் குட்டஹள்ளி மேம்பால நுழைவாயில் அருகே நடந்த அதிர்ச்சியூட்டும் சாலை ஆத்திரச் சம்பவம் (Road Rage), இணையதளங்களில் பெரும் கொந்தளிப்பை ஏற்படுத்தியுள்ளது. போக்குவரத்து நெரிசலில் மெதுவாகச் சென்று கொண்டிருந்தபோது, ஒரு வாடகைக் கார் அந்த நபரின் வாகனத்தின் மீது லேசாக மோதியுள்ளது. மிகச்சிறிய இந்த விவகாரத்தை அமைதியாகத் தீர்ப்பதற்குப் பதிலாக, அந்த நபர் கடும் கோபத்துடன் காரை விட்டு கீழே இறங்கி ஓட்டுநருடன் வாக்குவாதத்தில் ஈடுபட்டுள்ளார்.

கார் ஓட்டுநரைத் தாக்குவதற்காக அந்த நபர் ஆக்ரோஷமாக முன்னேறியபோது, அவருடன் வந்த அவரது வயதான தாய் அவரைத் தடுக்க முயன்றுள்ளார். ஆனால், ஆத்திரத்தில் இருந்த அந்த நபர், தனது சொந்தத் தாய் என்றும் பாராமல் அவரைப் பலமாகத் தள்ளிவிட்டுள்ளார். இதில் அந்த முதியவர் நிலைதடுமாறி சாலையில் விழுந்த நிலையிலும், அந்த நபர் தொடர்ந்து வாடகைக் கார் ஓட்டுநரை அறைந்து தனது வன்முறையைத் தொடர்ந்துள்ளார். இந்த மனிதாபிமானமற்ற செயல் அங்கிருந்தவர்களையும் சமூக வலைதளப் பயனர்களையும் அதிர்ச்சியில் ஆழ்த்தியுள்ளது.

இந்தச் சம்பவம் குறித்த காணொளி ‘எக்ஸ்’ (X) தளத்தில் வைரலாகி வரும் நிலையில், சம்பந்தப்பட்ட நபரின் வாகன எண்ணைக் குறிப்பிட்டுப் பலரும் கண்டனங்களைப் பதிவு செய்து வருகின்றனர். “தவறு யாராக இருந்தாலும், தனது தாயையே சாலையில் தள்ளிவிட்டு வன்முறையில் ஈடுபடுவது முறையா?” எனப் பலரும் கேள்வி எழுப்பியுள்ளனர். பொது இடங்களில் நிதானத்தை இழந்து இத்தகைய அநாகரீகமான செயல்களில் ஈடுபடுபவர்கள் மீது காவல்துறை கடுமையான நடவடிக்கை எடுக்க வேண்டும் என்ற கோரிக்கையும் வலுத்து வருகிறது.