பார்க்கவே பயமா இருக்கு… தண்ணீர் பிடிக்கப் போனவங்களுக்கு காத்திருந்த பகீர் சர்ப்ரைஸ்… இணையத்தைக் கலக்கும் திக் திக் வீடியோ…!

உத்தரகண்ட் மாநிலம் ஹரித்வார் அருகே உள்ள சராய் கிராமத்தில், குடியிருப்பு வீடு ஒன்றின் தண்ணீர் தொட்டிக்குள் இருந்து 27 குட்டிப் பாம்புகள் பத்திரமாக மீட்கப்பட்டுள்ளன. இந்த வீட்டின் உரிமையாளர் தனது தண்ணீர் தொட்டியைத் திறந்து பார்த்தபோது, உள்ளே ஏராளமான குட்டிப் பாம்புகள் நெளிவதைக் கண்டு அதிர்ச்சியடைந்துள்ளார். இதுகுறித்த தகவல் உடனடியாக வனத்துறை மற்றும் உள்ளூர் மீட்புக் குழுவினருக்குத் தெரிவிக்கப்பட்டது.

தகவலறிந்து சம்பவ இடத்திற்கு விரைந்து வந்த வனத்துறை மீட்புக் குழுவினர், தண்ணீர் தொட்டியிலிருந்த 27 குட்டிப் பாம்புகளையும் ஒவ்வொன்றாக லாவகமாகப் பிடித்து மீட்டனர். மீட்கப்பட்ட அனைத்துப் பாம்புகளும் எவ்வித காயமுமின்றி பாதுகாப்பாகப் பிரிக்கப்பட்டு, பின்னர் அருகில் உள்ள அடர்ந்த வனப்பகுதிக்குள் கொண்டு சென்று விடப்பட்டன. அதிர்ஷ்டவசமாக இந்த சம்பவத்தில் யாருக்கும் எந்தப் பாதிப்பும் ஏற்படவில்லை.

தண்ணீர் தொட்டிக்குள் இத்தனை பாம்புகள் கூட்டமாக இருந்ததை மீட்புக் குழுவினர் வீடியோவாகப் பதிவு செய்திருந்தனர். இந்த மீட்பு நடவடிக்கை குறித்த வீடியோ இணையதளங்களில் வெளியாகி, தற்போது சமூக ஊடகங்களில் மிகவும் வேகமாகப் பரவி வருகிறது. குடியிருப்புப் பகுதிக்குள் இப்படி ஒரே இடத்தில் இவ்வளவு பாம்புகள் மீட்கப்பட்டது அப்பகுதி மக்களிடையே பெரும் பரபரப்பையும் அச்சத்தையும் ஏற்படுத்தியுள்ளது.