அவமானங்களே வெற்றிக்கான வெகுமதி… என் மனதில் இன்றும் ஆறாத வடுக்கள் இருக்கிறது… இளைஞர்களுக்கு ஷாருக்கான் கொடுத்த மாஸ் அட்வைஸ்…!

பாலிவுட் திரையுலகின் ‘கிங் கான்’ என்று அன்போடு அழைக்கப்படும் நடிகர் ஷாருக்கான், தற்போது இயக்குநர் சித்தார்த் ஆனந்த் இயக்கத்தில் உருவாகி வரும் ‘கிங்’ திரைப்படத்தில் விறுவிறுப்பாக நடித்து வருகிறார். இத்திரைப்படத்தில் அவருடன் இணைந்து சுஹானா கான், அபிஷேக் பச்சன், தீபிகா படுகோன், அனில் கபூர் மற்றும் ஜாக்கி ஷெராப் உள்ளிட்ட பல முன்னணி நட்சத்திரங்கள் நடித்து வருவதால், ரசிகர்கள் மத்தியில் பெரும் எதிர்பார்ப்பு ஏற்பட்டுள்ளது. தற்போதும் சினிமாவின் உச்ச நட்சத்திரமாக ஜொலிக்கும் ஷாருக்கான், சமீபத்தில் நடைபெற்ற பொது நிகழ்ச்சி ஒன்றில் கலந்து கொண்டு தனது திரைப்பயணம் மற்றும் வாழ்க்கை அனுபவங்கள் குறித்து நெகிழ்ச்சியோடு பகிர்ந்து கொண்டார்.

அந்நிகழ்ச்சியில் பேசிய அவர், ஒரு மனிதன் தன் வாழ்க்கையில் தோல்விகளையும், கஷ்டங்களையும், அவமானங்களையும் கடந்து வராமல் ஒருபோதும் வெற்றியின் உச்சியை அடைய முடியாது என்று குறிப்பிட்டார். மேலும், தன்னுடைய ஆரம்பகால வாழ்க்கையிலும் பல கடுமையான அவமானங்களைச் சந்தித்திருப்பதாகவும், அவற்றில் சில நிகழ்வுகள் இன்றும் ஆறாத வடுக்களாகத் தன் மனதில் தங்கியிருப்பதாகவும் மனம் திறந்து பேசினார். ஆனால், நாம் சந்திக்கும் அந்த அவமானங்களே பிற்காலத்தில் நம் வெற்றிக்கான மாபெரும் வெகுமதியாக மாறும் என்பதை ஒவ்வொருவரும் புரிந்து கொள்ள வேண்டும் என்று அவர் சுட்டிக்காட்டினார்.

இக்கட்டான சூழ்நிலைகள் நம்மைச் சூழ்ந்தாலும், மனம் தளராமல் மீண்டும் எழுந்து ஓட வேண்டும் என்ற உத்வேகத்தை ஷாருக்கான் தன் பேச்சின் மூலம் விதைத்தார். வாழ்வில் தேடலும், விடாமுயற்சியும் இருக்கும் வரை வெற்றியை நோக்கிய நமது பயணமும் தொய்வின்றித் தொடரும் என்று ரசிகர்களுக்கும் இளைஞர்களுக்கும் ஊக்கமளிக்கும் வகையில் பேசி தனது உரையை நிறைவு செய்தார். இவரின் இந்த எதார்த்தமான பேச்சு சமூக வலைத்தளங்களில் வைரலாகி, பலருக்கும் புதிய நம்பிக்கையை அளித்து வருகிறது.