“வீடியோ இருக்கு, வெளியிடுவேன்”… எமனான இன்ஸ்டா..காதலித்து கழுத்தறுத்த காதலன்…. 17 வயது சிறுமியை அடுத்தடுத்து சீரழித்த 3 பேர்…..!

கன்னியாகுமரி மாவட்டத்தில் 17 வயது பள்ளிச் சிறுமியை மிரட்டி பாலியல் வன்கொடுமை செய்த வழக்கில், சமூக வலைதள நண்பர், உறவினர் உட்பட 4 பேரை குளச்சல் அனைத்து மகளிர் போலீஸார் போக்சோ சட்டத்தின் கீழ் கைது செய்து சிறையில் அடைத்துள்ளனர். கடந்த செப்டம்பர் 9-ஆம் தேதி காணாமல் போனதாகத் தேடப்பட்டு வந்த பிளஸ்-2 மாணவி, ஒரு வாரத்திற்குப் பிறகு வீடு திரும்பிய நிலையில், பெற்றோர் அளித்த புகாரின் பேரில் இந்த அதிர்ச்சி தரும் தகவல்கள் வெளிச்சத்திற்கு வந்துள்ளன.

போலீஸாரின் முதற்கட்ட விசாரணையில், இன்ஸ்டாகிராம் மூலம் அறிமுகமான 20 வயது இளைஞர் ஒருவருடன் சிறுமி பழகி வந்துள்ளார். காதலிப்பதாகக் கூறி சிறுமியுடன் தனியாக இருந்த தருணங்களை அவர் இரகசியமாகப் பதிவு செய்துள்ளார். பின்னர், அந்தப் புகைப்படங்கள் மற்றும் வீடியோக்களை சமூக வலைதளங்களில் வெளியிட்டு விடுவதாக மிரட்டி, அச்சிறுமியைப் பலமுறை பாலியல் வன்கொடுமை செய்துள்ளார்.

தனக்கு நேர்ந்த கொடுமை குறித்து சிறுமி தனது உறவினரான இளைஞரிடம் உதவி கேட்டுள்ளார். ஆனால், அவருக்கு உதவுவதற்குப் பதிலாக அந்த நபரும் சிறுமியை மிரட்டி பாலியல் அத்துமீறலில் ஈடுபட்டுள்ளார். இச்சம்பவத்தை அறிந்த உறவினரின் நண்பர், பிரச்சினையைத் தீர்த்து வைப்பதாகக் கூறி சிறுமியை அழைத்துச் சென்று, தனது மற்றொரு நண்பருடன் சேர்ந்து மீண்டும் பாலியல் வன்கொடுமைக்கு உள்ளாக்கியுள்ளார்.

இதையடுத்து பாதிக்கப்பட்ட சிறுமி ஆசாரிப்பள்ளம் அரசு மருத்துவக் கல்லூரி மருத்துவமனையில் சிகிச்சைக்காகச் சேர்க்கப்பட்டார். இச்சம்பவம் தொடர்பாகப் போக்சோ உட்பட 6 பிரிவுகளின் கீழ் வழக்குப் பதிவு செய்த போலீஸார், தீவிரத் தேடுதலுக்குப் பின் இருவரை உள்ளூரிலும், தலைமறைவாக இருந்த மற்ற இருவரை செல்போன் இருப்பிடத்தைக் கொண்டு சென்னையிலும் கைது செய்து நீதிமன்றத்தில் ஆஜர்படுத்திச் சிறையில் அடைத்தனர். இச்சம்பவம் அப்பகுதியில் பெரும் பரபரப்பை ஏற்படுத்தியுள்ள நிலையில், பெற்றோர் தங்கள் குழந்தைகளின் சமூக வலைதளப் பயன்பாட்டைக் கவனமாகக் கண்காணிக்க வேண்டும் என காவல்துறையினர் அறிவுறுத்தியுள்ளனர்.