“பாம்பின் தலை துண்டிக்கப்பட்டது” தலைமைச் செயலகத்தை தகர்த்து அமெரிக்கா வெளியிட்ட பரபரப்பு வீடியோ..!!

அமெரிக்கா மற்றும் இஸ்ரேல் படைகள் இணைந்து நடத்திய வான்வழித் தாக்குதலில், ஈரானின் இஸ்லாமிய புரட்சிகர காவல்படையின் (IRGC) தலைமையகம் முற்றிலும் அழிக்கப்பட்டதாக அமெரிக்க மத்திய கட்டளை மையம் (CENTCOM) அறிவித்துள்ளது. கடந்த 47 ஆண்டுகளில் ஆயிரத்திற்கும் மேற்பட்ட அமெரிக்கர்களின் உயிரிழப்பிற்கு இந்தக் குழுவே காரணம் என்று குற்றம் சாட்டியுள்ள அமெரிக்கா, இந்தத் தாக்குதலை “பாம்பின் தலையைத் துண்டிக்கும் செயல்” என்று வர்ணித்துள்ளது. இந்தத் தாக்குதல் தொடர்பான வீடியோ காட்சிகளையும் அமெரிக்க ராணுவம் வெளியிட்டுள்ளது.

மறுபுறம், இஸ்ரேலிய ராணுவம் ஈரானின் பல முக்கிய ராணுவ நிலைகள், உளவுத்துறை தலைமையகங்கள் மற்றும் வான்படை கட்டுப்பாட்டு மையங்கள் மீது தீவிரமான தாக்குதல்களை நடத்தியுள்ளதை உறுதிப்படுத்தியுள்ளது. ஈரானின் உச்ச தலைவர் ஆயதுல்லா அலி கமேனி கொல்லப்பட்டதாகத் தகவல் வெளியானதைத் தொடர்ந்து, இந்த மோதல் உச்சகட்டத்தை எட்டியுள்ளது. இத்தாக்குதல்கள் மூலம் ஈரானின் ஒட்டுமொத்த பாதுகாப்பு மற்றும் கட்டளைக் கட்டமைப்பைச் சிதைப்பதே தங்களின் நோக்கம் என்று இஸ்ரேல் தரப்பில் தெரிவிக்கப்பட்டுள்ளது.

இந்தத் தீவிரமான தாக்குதல்களைத் தொடர்ந்து, ஈரான் தனது தரப்பிலிருந்து ஏவுகணைகள் மற்றும் ட்ரோன்கள் மூலம் இஸ்ரேல் மற்றும் வளைகுடா நாடுகளில் உள்ள அமெரிக்க ராணுவ தளங்களை நோக்கிப் பதில் தாக்குதல் நடத்தியுள்ளது. இதனால் மத்திய கிழக்கு பிராந்தியத்தில் ஒரு முழு அளவிலான போர் மூளும் அபாயம் ஏற்பட்டுள்ளது. தற்போதைய சூழலில் ஈரானை நிர்வகிக்க இடைக்காலத் தலைமைக் குழு அமைக்கப்பட்டுள்ள நிலையில், சர்வதேச சமூகம் இந்தப் பதற்றமான சூழலை மிகுந்த கவலையுடன் கவனித்து வருகிறது.