“யாராவது காப்பாத்துங்க…” மூத்த வழக்கறிஞருக்கு கத்தியால் சரமாரி குத்து… மர்ம நபரின் வெறிச்செயல்… நெஞ்சை உலுக்கும் பகீர் வீடியோ…!!

கர்நாடக மாநிலம் சிக்கபள்ளாபூர் மாவட்டம் கௌரிபிதனூரில் மூத்த வழக்கறிஞர் ஒருவர் பட்டப்பகலில் நடுரோட்டில் வைத்து கத்தியால் கழுத்தில் கொடூரமாகக் குத்தப்பட்டு ரத்த வெள்ளத்தில் மிதந்த சம்பவம் அப்பகுதி சட்டத்துறை வட்டாரத்திலும் பொதுமக்களிடையேயும் பெரும் பதைபதைப்பையும் பரபரப்பையும் ஏற்படுத்தியுள்ளது.

கௌரிபிதனூர் மகாத்மா காந்தி வட்டம் அருகே உள்ள கசபா கிராமப்புற வேளாண் கூட்டுறவு சங்க கட்டிடத்தின் முதல் தளத்தில் மூத்த வழக்கறிஞர் சன்னக்கி வெங்கடராமப்பா என்பவரது அலுவலகம் இயங்கி வருகிறது. செவ்வாய்க்கிழமை காலை வழக்கம்போல அலுவலகத்திற்கு வந்த வெங்கடராமப்பா படிக்கட்டில் ஏறிச் சென்றபோது, அவரைப் பின்தொடர்ந்து வந்த மர்ம நபர் ஒருவன் திடீரெனத் தான் மறைத்து வைத்திருந்த கூர்மையான கத்தியால் அவரது கழுத்தில் கொடூரமாகக் குத்திவிட்டுத் தப்பியோடினான்.

கழுத்தில் பலத்த வெட்டுக் காயமடைந்து ரத்தம் சொட்டச் சொட்ட அலறிய வழக்கறிஞரை அக்கம் பக்கத்தினர் மீட்டு ஆட்டோவில் ஏற்றி முதலுதவி சிகிச்சைக்காக அனுப்பி வைத்தனர். பின்னர் மேல் சிகிச்சைக்காக அவர் பெங்களூரு மருத்துவமனைக்கு மாற்றப்பட்டார். இச்சம்பவத்தைக் கண்டித்துக் கௌரிபிதனூர் மற்றும் சிட்லகட்டா வழக்கறிஞர்கள் சங்கத்தினர் நீதிமன்றப் பணிகளைப் புறக்கணித்துப் போராட்டத்தில் ஈடுபட்டனர். இதனிடையே, களத்தில் குதித்த தனிப்படை போலீசார் கங்கசந்திரா பகுதியைச் சேர்ந்த துருவா என்பவனைக் கைது செய்து, இந்தத் தாக்குதலுக்குப் பின்னணியில் உள்ள கொடூரக் காரணம் குறித்துத் தீவிரமாக விசாரணை நடத்தி வருகின்றனர்.