ஏப்பா, ஏய்..! “எத்தனை கட்சியிலப்பா சேர்ப்பீங்க” செல்லூர் ராஜூ கலாய்.. பெரும் பரபரப்பு..!!

தமிழக அரசியலில் தற்போதைய ஆளுங்கட்சியான தமிழக வெற்றிக் கழகத்தை நோக்கி, அதிமுக மற்றும் திமுக உள்ளிட்ட பல்வேறு முன்னணி அரசியல் கட்சிகளில் இருந்து முக்கியப் பிரமுகர்கள் தொடர்ந்து தங்களை இணைத்துக் கொண்டு வருகின்றனர். இத்தகைய அரசியல் மாற்றங்களுக்கு மத்தியில், அதிமுகவின் மூத்த தலைவரும் முன்னாள் அமைச்சருமான செல்லூர் ராஜூவும் தவெக அல்லது திமுகவில் இணையப் போவதாக சமூக வலைத்தளங்களில் பரவலான தகவல்கள் கசிந்தன. இந்தத் தகவல் அரசியல் வட்டாரத்தில் பெரும் பரபரப்பை ஏற்படுத்திய நிலையில், இதற்கு அவர் தற்போது முற்றுப்புள்ளி வைத்துள்ளார்.

தவறான வதந்திகளுக்குப் பதிலடி கொடுக்கும் வகையில் செல்லூர் ராஜூ தனது ‘எக்ஸ்’ பக்கத்தில் காரசாரமான பதிவொன்றை வெளியிட்டுள்ளார். அதில், “ஏப்பா, ஏய்! எத்தனை கட்சியிலப்பா சேர்ப்பீங்க. நான் என்றும் புரட்சித்தலைவர், புரட்சித்தலைவியின் வழியில் தான். புரட்சித் தலைவர் ஏழைகளின் நன்மைக்காக உருவாக்கிய அதிமுக தான் என் வழி” என்று மிகவும் அழுத்தமாகக் குறிப்பிட்டுள்ளார். இதன் மூலம், தான் எப்போதும் அதிமுகவிலேயே நீடிப்பேன் என்பதையும், பரப்பப்படும் செய்திகள் முற்றிலும் வதந்திகள் என்பதையும் அவர் தெளிவுபடுத்தியுள்ளார்.