கேரளாவில் சர்வதேச திரைப்பட விழா, மத்திய அரசு தடை விதித்த படங்களை தடை மீறி திரையிடும் விழாக்குழு – சேட்டன்களுக்கு என்ன தில்லு பார்த்தியா?

கேரளம் மாநிலம், திருவனந்தபுரத்தில் கேரளா சல்சித்ரா அகாடமி சார்பில் கடந்த 12ம் தேதி துவங்கி வரும் 19ம் தேதி வரை சர்வதேச திரைப்பட விழா நாட்களுக்கு நடந்து வருகிறது. இந்நிகழ்ச்சியில் பல்வேறு நாடுகளை சேர்ந்த சுமார் 19 படங்களை திரையிட விழாக்குழு தேர்வு செய்திருந்தது. ஆனால் இந்த படங்களை திரையிட மத்திய தகவல் மற்றும் ஒளிபரப்பு அமைச்சகம் அனுமதி வழங்க மறுத்து விட்டது. பின்னர் பீஃப், ஈகல்ஸ் ஆஃப் ரி பப்ளிக், ஹார்ட் ஆஃப் தி வுஃல்ப், ஒன்ஸ் அப்பான் எ டைம் இன் காஸா போன்ற 4 படங்கள் மட்டுமே திரையிட அனுமதிக்கப்பட்டது.

சர்வதேச திரைப்பட விழாவில் திரையிட விழாக்குழு தரப்பில் தேர்வான படங்களுக்கு அனுமதி மறுத்த காரணங்களை, மத்திய அரசு தரப்பில் அதிகாரிகள் தெரிவிக்கவில்லை. இதனால் விழாக்குழு அதிரடி முடிவை எடுத்தது. மத்திய அரசின் அனுமதி கிடைக்காத சுமார் 15 படங்களை திருவனந்தபுரத்தில் நடக்கும் இந்த சர்வதேச திரைப்பட விழாவில் திட்டமிட்டபடி திரையிடுவதற்கு முடிவு செய்திருப்பதாக கேரளா சல்சித்ரா அகாடமி தலைவர் ரசூல் பூக்குட்டி நேற்று அறிவித்தார்.

கேரளாவில் மார்க்சிஸ்ட் கம்யூனிஸ்ட் கட்சியின் தலைமையிலான ஆளும் இடதுசாரி அரசின் ஆதரவை அடுத்து திரைப்பட விழா ஒருங்கிணைப்பாளர்கள் இந்த முடிவை எடுத்துள்ளனர். சர்வதேச திரைப்பட விழாவில் தேர்வான பாலஸ்தீன விவகாரம் குறித்த படங்களுக்கு மத்திய அரசு அனுமதி மறுத்ததாக கூறப்படுகிறது. இத்துடன் அனுமதி மறுக்கப்பட்ட மறைந்த புகழ்பெற்ற சோவியத் இயக்குனர் செர்ஜி ஐசென்ஸ்டீனின் நூறாண்டுகள் பழமையான பேட்டில்ஷிப் பொட்டெம்கின் என்னும் திரைப்படமும் திரையிடப்படுகிறது.