என் அப்பாவோட வாழ்க்கைத் தத்துவமே வேற… ஆனா அவர அங்க எல்லோரும் வில்லனாப் பாக்குறாங்க – சாவித்ரியின் மகள் பகிர்ந்த எமோஷனல் தருணம்!

தமிழ் சினிமாவில் சிவாஜி கணேசனுக்கு இணையான நடிப்பாற்றலைக் கொண்டவர் சாவித்ரி. அதனால்தான் அவரை திரையுலகினரும் ரசிகர்களும் நடிகையர் திலகம் என்று அழைத்தனர். ஆந்திராவைப் பூர்விகமாகக் கொண்ட அவர் தமிழ் மற்றும் தெலுங்கு சினிமாக்களில் நடித்து புகழ்பெற்றார்.

சாவித்ரிக்கும் மற்ற நடிகைகளுக்கும் உள்ள வித்தியாசமே சாவித்ரி ஒரு பல்துறை வித்தகர் என்பதுதான்.  அவர் படத் தயாரிப்பு மற்றும் இயக்கம் என பலதுறைகளில் கால்பதித்தார். ஆனால் நடிப்பு அளவுக்கு அவருக்கு மற்ற துறைகள் கைகொடுக்கவில்லை. அதனால் தனது சொத்துகளை இழந்து கடைசி காலத்தில் பொருளாதார ரீதியாக நலிவடைந்தார்.

சாவித்ரி தன்னுடன் நடித்த சக நடிகரான ஜெமினி கணேசனை திருமணம் செய்துகொண்டார். ஜெமினி கணேசனுக்கு அப்போது ஏற்கனவே இரண்டு முறை திருமணம் ஆகியிருந்தது. பாப்ஜி மற்றும் புஷ்பவல்லி ஆகிய இருவரும் அவரது முதல் இரண்டு மனைவிகளாக இருந்தன. சாவித்ரி ஜெமினி கணேசன் மேல் காதலில் விழுந்த போது அவருக்கு வயது 16 ஜெமினி கணேசனுக்கு 32 வயது.

ஆனால் அவர்கள் திருமண வாழ்வு நீண்டகாலம் நிலைத்து நிற்கவில்லை. ஒரு கட்டத்தில் இருவரும் பிரிந்துவிட்டனர். சாவித்ரியின் குடிப் பழக்கத்தால் பல உடல் உபாதைகளுக்கு ஆளாகி இறந்தார். இதனால் சாவித்ரியின் இந்த மரணத்துக்கு ஜெமினி கணேசன்தான் காரணம் என பலரும் இப்போது வரை பேசி வருகிறார்.  ஏனென்றால் அவருக்கு குடிப்பழக்கத்தை அறிமுகப்படுத்தியது ஜெமினி கணேசன்தான் என்பது அதற்கு முக்கியக் காரணம்.

இந்நிலையில் சாவித்ரி ஜெமினி கணேசன் ஆகியோரின் மகளான விஜய சாமுண்டீஸ்வரி தனது பெற்றோர் பற்றி பல தகவல்களைப் பகிர்ந்துள்ளார். அதில் “என்னுடைய அம்மா பற்றி தெலுங்கு மக்கள் உணர்வுபூர்மாக கனெக்ட் ஆகியுள்ளனர். ஆனால் அப்பா பற்றி அவர்களுக்கு அவ்வளவாக தெரியாது. அவர்களைப் பொறுத்தவரை ஜெமினி கணேசன் வில்லன்தான். இதை சொல்வதற்கு எனக்குக் கஷ்டமாக இருக்கிறது. ஆனால் அவர்கள் அப்படிதான் பார்த்தார்கள்.

அப்பா, அம்மாவைக் கல்யாணம் பண்ணி ஏமாத்திவிட்டார் என்றுதான் அவர்கள் நினைக்கிறார்கள். என் அப்பாவோட வாழ்க்கைத் தத்துவமே வேறு. அதை யாரும் புரிந்துகொள்வதில்லை. அவர் அந்த காலத்தில் பிறந்திருக்க வேண்டியவரே இல்லை. அவர் ரொம்ப முன்னோக்கி யோசிக்கக் கூடிய ஆள்” எனப் பேசியுள்ளார்.