பொம்பளைன்னு கூட பார்க்காம ஆபாச பேச்சு…. “இபிஎஸ்-திமுக டீலிங் போட்டதால் தான் வெளியே வந்தேன்”…. மேடையில் உடைத்த தவெக சத்யபாமா…!

அதிமுகவின் முன்னாள் நாடாளுமன்ற உறுப்பினரும், தவெக வேட்பாளருமான சத்தியபாமா தாராபுரத்தில் நடைபெற்ற பிரச்சாரக் கூட்டத்தில் பேசிய கருத்துகள் அரசியல் வட்டாரத்தில் பெரும் பரபரப்பை ஏற்படுத்தியுள்ளன. கூட்டத்தில் பேசிய அவர், “என்னை ஒரு பெண் என்றும் பாராமல் சமூக வலைதளங்களில் அவதூறாகவும் ஆபாசமாகவும் பேசி வருகிறார்கள். இதன்காரணமாகக் கடந்த இரண்டு மாதங்களாக நான் செல்போனைப் பயன்படுத்துவதையே நிறுத்திவிட்டேன். நான் தவறேதும் செய்யாததால் தான் மக்களிடம் துணிச்சலாக வந்து வாக்கு கேட்க முடிகிறது. என்னை இத்தனை துயரங்களுக்கும் ஆளாக்கிய திமுகவால் நான் கடுமையாகப் பாதிக்கப்பட்டேன். அதிமுக பொதுச்செயலாளர் எடப்பாடி பழனிசாமி திமுகவுடன் மறைமுக உடன்பாடு செய்யாமல் இருந்திருந்தால், என்னால் அதிமுகவிலிருந்து வெளியேறி இந்த இயக்கத்திற்கு வந்திருக்கவே முடியாது. அதற்கு அவருக்கு என் நன்றியைத் தெரிவித்துக் கொள்கிறேன்” என்று வெளிப்படையாகப் பேசினார்.

மேலும் தவெக தலைவர் விஜய்யை வெகுவாகப் பாராட்டிப் பேசிய அவர், எம்.ஜி.ஆர் பிரசாரத்திற்கு வரும்போது மக்கள் இரண்டு நாட்கள் வரை வழியில் காத்திருப்பார்கள் என்று தனது தந்தை கூறியதை நினைவுகூர்ந்தார். “இன்று தளபதி விஜய்யைப் பார்க்கும்போது, அவர் எம்.ஜி.ஆரின் மறுபிறவியோ என்று தோன்றும் அளவிற்கு மக்கள் எழுச்சி அடைந்துள்ளனர்; அப்படிப்பட்ட ஒரு தொலைநோக்கு தலைவரின் இயக்கத்தில் இணைந்து பணியாற்றுவதில் நான் மிகுந்த பெருமை கொள்கிறேன்” என்றும் சத்தியபாமா நெகிழ்ச்சியுடன் குறிப்பிட்டார். அரசியல் ரீதியாக திமுகவையும் அதிமுகவையும் கடுமையாகச் சாடி, விஜய்யை எம்.ஜி.ஆருடன் ஒப்பிட்டு அவர் பேசிய இந்தப் பேச்சு, தற்போது சமூக வலைதளங்களிலும் அரசியல் தளங்களிலும் விவாதப் பொருளாக மாறியுள்ளது.