உஷாரய்யா உஷாரு… உடையப் போகுது அமமுக?… டிடிவிக்கு ஆப்பு வைக்கும் ‘சின்னம்மா’…. அதிமுக கூட்டணிக்குள் புகுந்து விளையாடும் சசிகலாவின் ‘சைலண்ட்’ கேம்…!

2026 தமிழக சட்டமன்றத் தேர்தலை முன்னிட்டு, தமிழக அரசியலில் மீண்டும் சசிகலாவின் நகர்வுகள் சூடுபிடிக்கத் தொடங்கியுள்ளன. கடந்த சில காலமாக அமைதி காத்து வந்த சசிகலா, தற்போது தென் மாவட்டங்களை மையமாக வைத்து தனது அரசியல் வியூகங்களை ரகசியமாக வகுத்து வருகிறார். குறிப்பாக, எடப்பாடி பழனிசாமி தலைமையிலான அதிமுக-பாஜக கூட்டணியில் டிடிவி தினகரன் இணைந்தது, சசிகலா தரப்பை கடும் அதிர்ச்சியடையச் செய்துள்ளது. இதனால், தன்னை அரசியல் ரீதியாகப் புறக்கணித்த தினகரனுக்குப் பதிலடி கொடுக்கும் வகையில் சசிகலா செயல்படத் தொடங்கியுள்ளதாகக் கூறப்படுகிறது.

இந்த வியூகத்தின் ஒரு பகுதியாக, பிப்ரவரி 24-ஆம் தேதி ஜெயலலிதாவின் பிறந்தநாளை முன்னிட்டு மதுரையில் பிரம்மாண்ட பொதுக்கூட்டம் நடத்தி, ‘அம்மா அதிமுக’ என்ற புதிய கட்சியைத் தொடங்க சசிகலா திட்டமிட்டுள்ளார். இதன் மூலம் அமமுகவில் உள்ள அதிருப்தி நிர்வாகிகளையும், அதிமுகவின் முக்கிய நிர்வாகிகளையும் தனது பக்கம் இழுக்க அவர் காய் நகர்த்தி வருகிறார். தினகரனின் பிடியிலிருந்து அமமுகவைச் சிதைப்பதும், தென் மாவட்டங்களில் தனது செல்வாக்கை மீண்டும் நிலைநிறுத்துவதுமே சசிகலாவின் தற்போதைய முக்கிய நோக்கமாகப் பார்க்கப்படுகிறது.

சசிகலாவின் இந்த அதிரடித் திட்டங்கள் டிடிவி தினகரனின் அமமுக கட்சிக்கு பெரும் நெருக்கடியை ஏற்படுத்தியுள்ளன. அமமுகவின் முக்கிய நிர்வாகிகள் பலர் சசிகலாவுடன் தொடர்பில் இருப்பதாகவும், புதிய கட்சி அறிவிக்கப்பட்டதும் அவர்கள் சசிகலா அணியில் சேரத் தயாராக இருப்பதாகவும் தகவல்கள் வெளியாகியுள்ளன. இது தினகரனின் அரசியல் எதிர்காலத்திற்குப் பெரும் சவாலாக மாறியுள்ளது. மேலும், தமிழக வெற்றிக் கழகத்தின் தலைவர் விஜய்யுடன் சசிகலாவின் தம்பி திவாகரன் பேச்சுவார்த்தை நடத்தியதாக வெளியாகும் தகவல்கள், புதிய அரசியல் கூட்டணியின் சாத்தியக்கூறுகளை அதிகரித்துள்ளன.

தென் மாவட்டங்களான மதுரை, திருப்பரங்குன்றம் மற்றும் திருமங்கலம் போன்ற தொகுதிகளைக் குறிவைத்து சசிகலா தனது தேர்தல் வேலைகளைத் தொடங்கியுள்ளார். குறிப்பாக, திருமங்கலத்தில் முன்னாள் அமைச்சர் ஆர்.பி. உதயகுமாருக்கு எதிராக வேட்பாளரை நிறுத்துவது குறித்தும் அவர் ஆலோசித்து வருகிறார். சசிகலாவின் இந்த ‘சைலண்ட்’ அட்டாக், அமமுகவை மட்டுமல்லாமல் எடப்பாடி பழனிசாமி தலைமையிலான அதிமுகவையும் கலக்கமடையச் செய்துள்ளது. 2026 தேர்தலில் இந்த வியூகங்கள் எந்த மாதிரியான தாக்கத்தை ஏற்படுத்தும் என்பதை அரசியல் விமர்சகர்கள் உற்று நோக்கி வருகின்றனர்.