“இனிமே நாங்க தான்.. அதிமுகவில் அடித்துக் கொள்ளும் தலைகள்”… சத்தமில்லாமல் களம் இறங்கும் சசிகலா… அடுத்த 24 மணிநேரத்தில் நடக்கப்போகும் அதிரடி மாற்றம்….!

தமிழக சட்டப்பேரவைத் தேர்தலில் அதிமுக சந்தித்த பின்னடைவைத் தொடர்ந்து, அக்கட்சிக்குள் ஏற்பட்டுள்ள உள்கட்சி மோதல் தற்போது முன்னெப்போதும் இல்லாத வகையில் தீவிரமடைந்துள்ளது. எடப்பாடி பழனிசாமி தலைமையில் ஒரு அணியும், முன்னாள் அமைச்சர்கள் சி.வி. சண்முகம் மற்றும் எஸ்.பி. வேலுமணி தலைமையில் மற்றொரு அணியும் என அதிமுக இரண்டாகப் பிளவுபட்டுள்ளது. குறிப்பாக, சட்டப்பேரவை குழுத் தலைவர் மற்றும் கொறடா பதவிகளைக் கைப்பற்றுவதில் இரு தரப்பினருக்கும் இடையே ஏற்பட்டுள்ள சட்டப் போராட்டம், தமிழக அரசியலில் பெரும் விவாதத்தை கிளப்பியுள்ளது.

சட்டப்பேரவையில் அதிமுகவின் அதிகாரப்பூர்வ கொறடாவாக அக்ரி கிருஷ்ணமூர்த்தியை எடப்பாடி பழனிசாமி நியமித்துள்ள நிலையில், அதனை எதிர்த்து சி.வி. சண்முகம் தரப்பு சி. விஜயபாஸ்கரை கொறடாவாக அறிவித்துள்ளது. சமீபத்தில் நடந்த நம்பிக்கை வாக்கெடுப்பின் போது எஸ்.பி. வேலுமணி அணியினர் தவெக அரசுக்கு ஆதரவாக வாக்களித்தது மோதலை உச்சக்கட்டத்திற்கு கொண்டு சென்றது. இதன் விளைவாக, அந்த அணியைச் சேர்ந்த முக்கிய நிர்வாகிகளின் கட்சிப் பொறுப்புகளை எடப்பாடி பழனிசாமி அதிரடியாகப் பறித்துள்ளார்.

இந்த அதிகாரப் போட்டியின் அடுத்த கட்டமாக, இரு தரப்பினரும் தனித்தனியாக சட்டப்பேரவைத் தலைவர் ஜே.சி.டி. பிரபாகரை சந்தித்துத் தங்களது தரப்பு நியாயங்களை முன்வைத்துள்ளனர். எடப்பாடி பழனிசாமி தரப்பு, அரசுக்கு ஆதரவாக வாக்களித்த எம்.எல்.ஏக்கள் மீது நடவடிக்கை எடுக்கக் கோரியுள்ள நிலையில், சி.வி. சண்முகம் தரப்போ தங்களிடம் தான் பெரும்பான்மை எம்.எல்.ஏக்கள் உள்ளனர் என்றும், எனவே வேலுமணியை எதிர்க்கட்சித் தலைவராக அங்கீகரிக்க வேண்டும் என்றும் வலியுறுத்தியுள்ளனர். இதனால் அதிமுகவின் உண்மையான பலம் யாரிடம் உள்ளது என்பதைத் தீர்மானிக்கும் அதிகாரம் தற்போது சபாநாயகர் வசம் சென்றுள்ளது.

கட்சிக்குள் நிலவும் இந்தத் தொடர் குழப்பங்களுக்கு இடையே, சசிகலா தரப்பும் மீண்டும் அதிமுகவைக் கைப்பற்ற ரகசியத் திட்டங்களை வகுத்து வருவதாகக் கூறப்படுகிறது. மறுபுறம், தவெக அரசு அமைக்கப்பட்டதில் முறைகேடுகள் நடந்துள்ளதாக ஆளுநரிடம் புகார் அளிக்க எடப்பாடி பழனிசாமி தரப்பு முடிவு செய்துள்ளது. எம்ஜிஆர் மாளிகையில் பலத்த போலீஸ் பாதுகாப்பு போடப்பட்டுள்ள சூழலில், அதிமுகவின் இந்த அதிகாரப் போர் கட்சியின் எதிர்காலத்தையும், அதன் தலைமையையும் தீர்மானிக்கும் ஒரு முக்கிய திருப்புமுனையாகப் பார்க்கப்படுகிறது.