அதிமுக இனி மொத்தமா காலி… காங்கிரஸுக்கு 5 அமைச்சர்கள்… தன் பங்குக்கு துண்டு போட்ட கார்த்தி சிதம்பரம்… அடுத்த பரபரப்பு…!

தமிழக அரசியல் களத்தில் ஏற்பட்டுள்ள அதிரடி மாற்றங்களுக்கு இடையே, தமிழக வெற்றி கழகம் (தவெக) தலைமையிலான அரசு ஒரு சிறுபான்மை அரசு கிடையாது என்றும், அது ஐந்தாண்டு காலத்தை சுமுகமாக நிறைவு செய்யும் என்றும் கார்த்தி சிதம்பரம் எம்பி தெரிவித்துள்ளார். சிவகங்கையில் செய்தியாளர்களைச் சந்தித்த அவர், தவெக அமைச்சரவையில் காங்கிரஸைச் சேர்ந்த ஐந்து சட்டமன்ற உறுப்பினர்களுக்கும் அமைச்சர் பதவி வழங்கப்பட்டால் அது மிகுந்த மகிழ்ச்சி அளிக்கும் எனக் குறிப்பிட்டார். மேலும், வரும் நாடாளுமன்ற மற்றும் உள்ளாட்சித் தேர்தல்களிலும் தவெக-காங்கிரஸ் கூட்டணி தொடரும் என்பதை அவர் உறுதிப்படுத்தினார்.

அதிமுகவின் தற்போதைய நிலை குறித்துப் பேசிய கார்த்தி சிதம்பரம், தொடர் தோல்விகளால் அந்த கட்சி மூன்றாவது இடத்திற்குத் தள்ளப்பட்டிருப்பது அதன் எதிர்காலத்திற்கே கேள்விக்குறியாக அமைந்துள்ளதாகக் கூறினார். எடப்பாடி பழனிசாமி தலைமையிலான அதிமுக உடையலாம் அல்லது பிற கட்சிகளுடன் இணையலாம் என கணித்த அவர், அதிமுகவில் தலைமை மாற்றம் உள்ளிட்ட பெரிய மாற்றங்கள் வருவது உறுதி என்றார். அதேவேளையில், திமுக ஒரு வலுவான அரசியல் தலைமை கொண்ட கட்சி என்றும், தமிழக அரசியலில் அது எப்போதும் ஒரு பிரதான சக்தியாகவே விளங்கும் என்றும் அவர் சுட்டிக்காட்டினார்.

மத்திய அரசின் செயல்பாடுகள் குறித்து விமர்சித்த கார்த்தி சிதம்பரம், பிரதமர் மோடி முன்வைத்துள்ள வேண்டுகோள்களுக்குப் பின்னால் உள்ள மர்மத்தை விளக்க வெள்ளை அறிக்கை வெளியிட வேண்டும் என வலியுறுத்தினார். குறிப்பாக, இந்தியா மற்றும் அமெரிக்கா இடையிலான வர்த்தக ஒப்பந்தங்கள் இன்னும் கையெழுத்தாகாத நிலையில், மத்திய அரசு வெளிப்படைத்தன்மை இல்லாமல் செயல்படுவதாகக் குற்றம் சாட்டினார். மேலும், தமிழக அரசின் மதுபானக் கடைகளின் வீச்சைக் குறைக்கும் நடவடிக்கையை வரவேற்றாலும், தமிழகத்தில் பூரண மதுவிலக்கு என்பது நடைமுறையில் சாத்தியமில்லை என்ற தனது கருத்தையும் அவர் பதிவு செய்தார்.

இதற்கிடையே, காங்கிரஸ் எம்பி மாணிக்கம் தாகூர் தனது சமூக வலைதளப் பதிவில், தமிழக அமைச்சரவையில் காங்கிரஸுக்கு இரண்டு இடங்கள் கிடைக்கும் எனக் குறிப்பிட்டிருந்தது விவாதத்தை ஏற்படுத்தியுள்ளது. 59 ஆண்டுகளுக்குப் பிறகு தமிழக அமைச்சரவையில் கதர் அணிந்த காங்கிரஸ் அமைச்சர்கள் இடம் பிடிப்பது வரலாற்றுச் சிறப்புமிக்க தருணம் என்று அவர் நெகிழ்ச்சியுடன் தெரிவித்துள்ளார். ஊழலற்ற ஆட்சியைத் தமிழகத்தில் நிலைநாட்ட தவெக தலைவர் விஜய் தனது ‘அதிகாரத்தில் பங்கு’ என்ற வாக்குறுதியை நிறைவேற்றியிருப்பதாகக் கூறிய அவர், இது ஆயிரக்கணக்கான காங்கிரஸ் தொண்டர்களுக்கு உணர்ச்சிப்பூர்வமான தருணம் என்றும் பதிவிட்டுள்ளார்.