‘இபிஎஸ்-ஐ முதல்வராக்கியது நான் செய்த தப்பு”… பெயரைக் கூட சொல்ல விரும்பவில்லை…. மேடையிலேயே கண்ணீர் விட்ட சசிகலா….!

மறைந்த முன்னாள் முதல்வர் ஜெயலலிதாவின் 78-வது பிறந்தநாளை முன்னிட்டு ராமநாதபுரத்தில் நடைபெற்ற பிரம்மாண்ட பொதுக்கூட்டத்தில் சசிகலா கலந்துகொண்டு உரையாற்றினார். அதிமுகவின் கொடி பொருத்தப்பட்ட வாகனத்தில் வந்து இறங்கிய அவர், தற்போதைய அரசியல் சூழல் மற்றும் அதிமுகவின் உட்கட்சி விவகாரங்கள் குறித்து மிகக் காட்டமாகப் பேசினார். குறிப்பாக, முன்னாள் முதல்வர் எடப்பாடி பழனிசாமியின் பெயரைக்கூட உச்சரிக்க விரும்பவில்லை என்று கூறி தனது கடும் அதிருப்தியை வெளிப்படுத்தியது அரசியல் வட்டாரத்தில் பெரும் பரபரப்பை ஏற்படுத்தியுள்ளது.

தனது உரையில் அதிமுக உருவான வரலாற்றை நினைவுகூர்ந்த சசிகலா, எம்ஜிஆர் அவர்கள் திமுகவிலிருந்து நீக்கப்பட்ட பிறகு அனகாபுத்தூர் ராமலிங்கம் பதிவு செய்து வைத்திருந்த கட்சியை ஏற்றே அதிமுகவை வழிநடத்தினார் என்பதைச் சுட்டிக்காட்டினார். ஜெயலலிதாவின் மறைவுக்குப் பின், கட்சியினரின் வேண்டுகோளுக்கு இணங்கவே தான் பொதுச்செயலாளர் பொறுப்பை ஏற்றதாகவும், தனக்கு முதல்வர் நாற்காலியின் மீது ஆசை இருக்கவில்லை என்றும் அவர் விளக்கமளித்தார். ஓபிஎஸ் அவர்களுக்கு ஏற்பட்ட நெருக்கடிகள் காரணமாகவே தான் முதல்வர் பொறுப்பை ஏற்க முடிவெடுத்ததாக அவர் குறிப்பிட்டார்.

எடப்பாடி பழனிசாமி குறித்துப் பேசுகையில், “யாரை முதல்வராக அமர வைத்தேனோ, அவரே என்னை முதுகில் குத்தி கட்சியை விட்டு நீக்கினார்” என்று சசிகலா கொந்தளித்தார். சிறையில் இருந்தபோது தனக்குக் கொடுக்கப்பட்ட நெருக்கடிகள், தனது கணவர் உடல்நலம் பாதிக்கப்பட்டிருந்தபோது பரோல் பெறுவதில் நீடித்த சிக்கல்கள் என அனைத்திற்கும் எடப்பாடி பழனிசாமி தரப்பே காரணம் என்று அவர் குற்றம் சாட்டினார். “நல்லவர்கள் பெயரைச் சொல்லலாம், ஆனால் இந்தப் பெயரைச் சொல்லக்கூட எனக்குப் பிடிக்கவில்லை” என்று கூறி ஈபிஎஸ் மீதான தனது வெறுப்பை வெளிப்படையாகப் பதிவு செய்தார்.

தற்போதைய அரசியல் சூழலில் அதிமுக, பாஜக மற்றும் அமமுக ஆகிய கட்சிகள் கூட்டணி அமைத்துள்ள நிலையில், ஓபிஎஸ் மற்றும் சசிகலாவை மீண்டும் கட்சியில் இணைக்க எடப்பாடி பழனிசாமி தொடர்ந்து மறுப்பு தெரிவித்து வருகிறார். இந்தச் சூழலில், ராமநாதபுரம் கூட்டத்தில் சசிகலா காட்டிய அதிரடி வேகம், வரும் தேர்தல்களில் அதிமுகவின் அதிகாரப்பூர்வ தலைமைக்கு அவர் விடுக்கப்போகும் சவாலாகவே பார்க்கப்படுகிறது. துரோகம் செய்தவர்களைத் தொண்டர்கள் மன்னிக்க மாட்டார்கள் என்ற தொனியில் அமைந்த அவரது உரை, தென் தமிழக அரசியலில் புதிய திருப்பத்தை ஏற்படுத்தியுள்ளது.