“அந்த ஜாதிகாரங்களுக்கு மட்டும் தான் சீட்”…. சசிகலாவின் புதிய கணக்கு… முக்கியத் தலைவர்கள் கூண்டோடு விலகல்?…. அதிர்ச்சியில் தொண்டர்கள்….!

தமிழக சட்டசபை தேர்தல் களம் நான்கு முனைப் போட்டிகளிலிருந்து, தற்போது சசிகலாவின் ‘அனைத்திந்திய புரட்சித் தலைவர் மக்கள் முன்னேற்றக் கழகம்’ மற்றும் ராமதாஸின் ‘பாமக’ கூட்டணி மூலம் ஐந்தாவது முனையை நோக்கி நகர்ந்துள்ளது. அதிமுகவை ஒருங்கிணைக்கும் முயற்சி கைகூடாத நிலையில், சசிகலா தொடங்கியுள்ள இந்தப் புதிய கட்சி, 234 தொகுதிகளிலும் போட்டியிடும் என அறிவிக்கப்பட்டு இதுவரை 80 வேட்பாளர்கள் வரை அடையாளம் காணப்பட்டுள்ளனர். இன்றுடன் வேட்புமனு தாக்கல் நிறைவடையும் சூழலில், நாளை முதல் தென் மாவட்டங்களில் சசிகலா தனது அனல் பறக்கும் பிரச்சாரத்தைத் தொடங்கத் திட்டமிட்டுள்ளார்.

இருப்பினும், கட்சி தொடங்கிய வேகத்திலேயே சசிகலாவுக்கு உள்ளிருந்தே பலத்த எதிர்ப்புகள் கிளம்பியுள்ளன. குறிப்பாக, சசிகலா சிறையில் இருந்தபோதும், அவர் அரசியலில் தனிமைப்படுத்தப்பட்ட காலங்களிலும் அவருக்கு அரணாக நின்ற நீண்டகால விசுவாசிகள் தற்போது ஓரங்கட்டப்பட்டுள்ளதாகக் கூறப்படுகிறது. டிடிவி தினகரனின் அமமுக-விலிருந்து சமீபத்தில் பிரிந்து வந்து இணைந்தவர்களுக்கு மட்டுமே வேட்பாளர் பட்டியலில் முன்னுரிமை வழங்கப்படுவதாக மூத்த நிர்வாகிகள் குற்றம் சாட்டுகின்றனர். இந்த ‘சீட்’ அரசியலால் கட்சிக்குள் பெரும் சலசலப்பு ஏற்பட்டுள்ளது.

இந்த அதிருப்தியின் உச்சமாக, முன்னாள் அரசு கொறடா நரசிம்மன், முன்னாள் அமைச்சர் ஆனந்தன் மற்றும் பூவை கண்டன் உள்ளிட்ட முக்கியத் தலைவர்கள் கட்சியை விட்டு வெளியேற முடிவு செய்திருப்பதாகத் தகவல்கள் கசிகின்றன. சாதி அடிப்படையில் வேட்பாளர்கள் தேர்வு செய்யப்படுவதாகவும், விசுவாசத்தை விட தற்காலிக அரசியல் லாபங்களுக்கே சசிகலா முக்கியத்துவம் அளிப்பதாகவும் அவர்கள் அதிருப்தி தெரிவித்துள்ளனர். கடினமான காலங்களில் உடனிருந்தவர்களைப் புறக்கணித்துவிட்டு, தேர்தல் வெற்றிக்காக மட்டும் புதியவர்களை முன்னிறுத்துவது தங்களை அவமதிப்பதாக அவர்கள் கருதுகின்றனர்.

வேட்புமனு தாக்கல் முடியும் கடைசி நேரத்தில் எழுந்துள்ள இந்த உட்கட்சிப் பூசல், சசிகலாவின் தேர்தல் கணக்குகளைச் சிதைக்கக்கூடும் என அரசியல் விமர்சகர்கள் கருதுகின்றனர். நாளை திருப்பரங்குன்றம், மதுரை, ஆண்டிபட்டி உள்ளிட்ட பகுதிகளில் சசிகலா பிரச்சாரத்தைத் தொடங்கவுள்ள நிலையில், இந்த அதிருப்தி அலைகளை அவர் எப்படிச் சமாளிக்கப் போகிறார் என்பது சவாலான காரியமே. விசுவாசிகளின் குமுறலைத் தீர்க்கத் தவறினால், தேர்தல் களத்தில் கட்சியின் செல்வாக்கு பாதிக்கப்படும் அபாயம் உள்ளது.