“கொரோனாவை விட மோசமான பாதிப்பு”.. ஈரான் போரால் உலகிற்கு காத்திருக்கும் ‘மகா கஷ்ட காலம்’… ரஷ்ய அதிபர் வார்னிங்…!

ஈரான் மற்றும் இஸ்ரேல் இடையிலான போர் ஒரு மாதத்தைக் கடந்து தீவிரமடைந்துள்ள நிலையில், அதன் பாதிப்புகள் உலக நாடுகளைப் பேரதிர்ச்சிக்கு உள்ளாக்கியுள்ளன. போரின் தொடர்ச்சியாக ஈரானின் உச்ச தலைவர் கமேனி கொல்லப்பட்டதும், அவருக்குப் பின் பொறுப்பேற்ற அவரது மகன் மோஜ்தபா கமேனி இஸ்ரேலியத் தாக்குதலில் படுகாயமடைந்து கோமா நிலையில் இருப்பதாகக் கூறப்படுவதும் ஈரானின் அரசியல் ஸ்திரத்தன்மையைச் சிதைத்துள்ளது. அதே வேளையில், அமெரிக்காவிற்கு ஆதரவளிக்கும் வளைகுடா நாடுகள் மீது ஈரான் நடத்திய பதில் தாக்குதல்கள், மத்திய கிழக்கு பிராந்தியத்தையே போர்க்களமாக மாற்றியுள்ளது. இந்தத் தொடர் மோதல்கள் இரு தரப்பிலும் ஈடுகட்ட முடியாத உயிர்ச் சேதங்களையும், பொருளாதார அழிவுகளையும் ஏற்படுத்தியுள்ளன.

இந்தப்போர் வெறும் எல்லைப் பிரச்சனையாக இல்லாமல், உலகளாவிய பொருளாதார நெருக்கடியாக உருவெடுத்துள்ளது. குறிப்பாக, கச்சா எண்ணெய் விநியோகம் தடைபட்டுள்ளதால் இந்தியா போன்ற நாடுகள் பெரும் சவாலைச் சந்தித்து வருகின்றன. இந்தியாவில் சமையல் எரிவாயு தட்டுப்பாடு காரணமாக உணவகங்கள் மூடப்படும் நிலைக்குத் தள்ளப்பட்டுள்ளன, இதனால் உணவுப் பொருட்களின் விலையும் கிடுகிடுவென உயர்ந்துள்ளது. சாமானிய மக்களின் அன்றாட வாழ்க்கை இந்தப்போர்ச் சூழலால் நேரடியாகப் பாதிக்கப்பட்டுள்ளது, இது ஒரு போரின் தாக்கம் எவ்வளவு தூரம் பரவக்கூடும் என்பதற்குச் சான்றாக அமைந்துள்ளது.

இந்நிலையில், ரஷ்ய அதிபர் விளாடிமிர் புதின் விடுத்துள்ள எச்சரிக்கை உலக நாடுகளின் கவனத்தை ஈர்த்துள்ளது. ‘ஈரான் போரினால் ஏற்படும் விளைவுகள், கொரோனா பெருந்தொற்றுக் காலத்தில் நாம் சந்தித்த பாதிப்புகளை விட மிக மோசமாக இருக்கும்’ என அவர் எச்சரித்துள்ளார். ஏற்கனவே இந்தியப் பிரதமர் நரேந்திர மோடியும் இந்தப் போரின் தீவிரத்தை கொரோனா காலத்துடன் ஒப்பிட்டு கவலை தெரிவித்திருந்தது குறிப்பிடத்தக்கது. அமைதியே தற்போதையத் தீர்வாக முன்வைக்கப்படும் நிலையில், இந்தப் போர் விரைவில் முடிவுக்கு வந்து உலகப் பொருளாதாரம் மீண்டும் பழைய நிலைக்குத் திரும்ப வேண்டும் என்பதே அனைவரின் எதிர்பார்ப்பாக இருக்கிறது.