சம்பவத்தை தொடங்கிய அமித்ஷா?…. ரூ.1020 கோடி மெகா ஊழல்…. அமைச்சர் கே.என்.நேருவுக்குக் காத்திருக்கும் அதிர்ச்சி…!

தமிழக நகராட்சி நிர்வாகம் மற்றும் குடிநீர் வழங்கல் துறையில் சுமார் 1,020 கோடி ரூபாய் வரை ஊழல் நடைபெற்றுள்ளதாக அமலாக்கத்துறை முன்வைத்துள்ள குற்றச்சாட்டு, அரசியல் களத்தில் பெரும் புயலைக் கிளப்பியுள்ளது. அமைச்சர் கே.என்.நேரு மற்றும் அவரது குடும்பத்தினருக்குத் தொடர்புடைய இடங்களில் நடத்தப்பட்ட சோதனைகளில் கிடைத்த டிஜிட்டல் ஆதாரங்களின் அடிப்படையில், ஒப்பந்தங்கள் வழங்குவதில் 7.5% முதல் 10% வரை லஞ்சமாகப் பெறப்பட்டதாக அமலாக்கத்துறை தெரிவித்துள்ளது. கழிப்பறைகள் பராமரிப்பு, சாலைப் பணிகள் மற்றும் குடிநீர் திட்டங்கள் என ஒவ்வொரு ஒப்பந்தத்திலும் முறைகேடுகள் நடந்திருப்பதாகக் கூறப்படும் நிலையில், இந்தப் பணம் ஹவாலா முறையில் கைமாறியுள்ளதாகவும் தகவல்கள் வெளியாகியுள்ளன.

இந்த விவகாரம் தொடர்பாக அதிமுக முன்னாள் எம்.எல்.ஏ இன்பதுரை சென்னை உயர்நீதிமன்றத்தில் மனுத்தாக்கல் செய்துள்ளார். லஞ்ச ஒழிப்புத் துறைக்கு அளிக்கப்பட்ட புகாரின் மீது இதுவரை நடவடிக்கை எடுக்கப்படாததால், நீதிமன்றம் இதில் நேரடியாகத் தலையிட்டு உத்தரவிட வேண்டும் என்று அவர் கோரிக்கை விடுத்துள்ளார். அமலாக்கத்துறையின் கடிதங்களைத் தொடர்ந்து, தற்போது தமிழக அரசு இந்த ஊழல் புகார்கள் குறித்து அதிகாரப்பூர்வமாக முதற்கட்ட விசாரணையைத் தொடங்க உத்தரவிட்டுள்ளது. இது திமுக அமைச்சரவைக்கு உள்ளேயே ஒரு சலசலப்பை ஏற்படுத்தியுள்ளது.

அமைச்சர் கே.என்.நேருவுக்கு எதிரான இந்த விசாரணைகள் தீவிரமடைந்து வரும் நிலையில், அவர் விரைவில் கைது செய்யப்பட வாய்ப்புள்ளதாக டெல்லி வட்டாரங்கள் தெரிவிப்பதாக செய்திகள் குறிப்பிடுகின்றன. குறிப்பாக, மத்திய உள்துறை அமைச்சர் அமித் ஷாவின் தமிழக வருகைக்குப் பிறகு இந்த வழக்கு வேகமெடுத்துள்ளது கவனிக்கத்தக்கது. வரும் தேர்தல் நேரத்தில் இந்த ஊழல் புகார் மற்றும் விசாரணை நடவடிக்கைகள் அமைச்சர் கே.என்.நேருவின் அரசியல் வாழ்க்கையிலும், தமிழக அரசியல் சூழலிலும் ஒரு தலைகீழ் மாற்றத்தை ஏற்படுத்தும் என எதிர்பார்க்கப்படுகிறது.