நடிகர் விஜய் நம்பர் 1 இல்லையா?… ரூ.5,863 கோடி சொத்து… கண்ணைக் கட்டும் அதிமுக வேட்பாளரின் பிரமாண பத்திரம்.. மிரண்டு போன அரசியல் களம்….!

தமிழக சட்டசபைத் தேர்தல் களம் தற்போது அனல் பறக்கத் தொடங்கியுள்ள நிலையில், வேட்பாளர்களின் சொத்து விவரங்கள் குறித்த ‘ஏடிஆர்’ (ADR) அறிக்கை மக்கள் மத்தியில் பெரும் வியப்பை ஏற்படுத்தியுள்ளது. இந்தத் தேர்தலில் சுமார் 981 வேட்பாளர்கள் கோடீஸ்வரர்களாக வலம் வருகிறார்கள். திரைத்துறையில் உச்ச நட்சத்திரமாக இருந்து அரசியலில் கால் பதித்துள்ள தமிழக வெற்றிக் கழகத் தலைவர் விஜய் தான் இந்தப் பட்டியலில் முதலிடத்தில் இருப்பார் என்று பலரும் எதிர்பார்த்தனர். ஆனால், அவரது சொத்து மதிப்பையும் தாண்டி அதிமுக வேட்பாளர் ஒருவர் இமாலய சொத்து மதிப்புடன் முதலிடத்தைப் பிடித்துள்ளார்.

இந்தப் பட்டியலில் முதலிடம் வகிப்பவர் திருச்சி லால்குடி தொகுதியின் அதிமுக வேட்பாளர் லீமா ரோஸ் மார்டின் ஆவார். பிரபல தொழிலதிபர் மார்டினின் மனைவியான இவரது சொத்து மதிப்பு சுமார் ரூ.5,863 கோடி எனத் தெரிவிக்கப்பட்டுள்ளது. இவரைத் தொடர்ந்து தவெக தலைவர் விஜய் ரூ.648+ கோடி சொத்து மதிப்புடன் இரண்டாம் இடத்தில் உள்ளார். அவர் சென்னை பெரம்பூர் மற்றும் திருச்சி கிழக்கு ஆகிய இரு தொகுதிகளில் போட்டியிடுகிறார். மூன்றாவது இடத்தில் தவெக பொதுச்செயலாளர் ஆதவ் அர்ஜுனா ரூ.534+ கோடி சொத்துக்களுடன் நீடிக்கிறார்.

டாப் 10 பட்டியலில் அதிமுக மற்றும் திமுக வேட்பாளர்கள் சரிசமமாகப் போட்டி போடுகின்றனர். நான்காவது இடத்தில் அதிமுகவின் இசக்கி சுப்பையாவும் (ரூ.419+ கோடி), ஐந்தாவது இடத்தில் திமுகவின் கார்த்திக் மோகனும் (ரூ.346 கோடி) உள்ளனர். அதனைத் தொடர்ந்து திமுக வேட்பாளர்கள் மதியழகன், வி.ஜி. ராஜேந்திரன் ஆகியோரும், அதிமுகவின் கே.ஆர். ஜெயராம் மற்றும் கொமதேகவின் நித்தியானந்தன் ஆகியோரும் இந்தப் பட்டியலில் இடம்பெற்றுள்ளனர். பத்தாவது இடத்தில் நெல்லை தவெக வேட்பாளர் ஆர்.எஸ். முருகன் ரூ.158+ கோடி சொத்துக்களுடன் இருக்கிறார்.

கல்வித் தகுதி மற்றும் குற்றப் பின்னணிகளைக் காட்டிலும், வேட்பாளர்களின் பொருளாதார பலம் வாக்காளர்கள் மத்தியில் அதிக விவாதங்களை உருவாக்கியுள்ளது. குறிப்பாக, மார்டின் குடும்பத்தைச் சேர்ந்த இருவர் (லீமா ரோஸ் மற்றும் ஆதவ் அர்ஜுனா) வெவ்வேறு கட்சிகளில் இருந்தாலும், டாப் 3 இடங்களுக்குள் வந்துள்ளது அரசியல் வட்டாரத்தில் பேசுபொருளாகியுள்ளது. இந்தப் பணக்கார வேட்பாளர்களின் பட்டியல், தேர்தல் களத்தில் நிலவும் பொருளாதாரப் போட்டி மற்றும் அதிகார பலத்தை வெளிச்சம் போட்டுக் காட்டுகிறது.