BREAKING: 24 மணி நேரத்தில் ரிலீஸான ரூ.23.95 லட்சம்…. பாரதிதாசனின் கல்விக்கனவை காப்பாற்றிய அந்த ஒற்றை குரல்…. சற்றுமுன் நிதி விடுவிப்பு….!

அரியலூர் மாவட்டத்தைச் சேர்ந்த மாணவர் பாரதிதாசன், தமிழக அரசின் ‘அம்பேத்கர் அயலக கல்வி உதவித்தொகை’ திட்டத்தின் கீழ் மலேசியாவில் உயர்கல்வி பெற்று ஆராய்ச்சிப் படிப்பை மேற்கொண்டு வருகிறார். கடந்த சில ஆண்டுகளாக இந்த நிதியுதவியைக் கொண்டு வெற்றிகரமாக தனது படிப்பைத் தொடர்ந்த அவருக்கு, இந்த ஆண்டு உதவித்தொகை வழங்குவதில் தாமதம் ஏற்பட்டது. இதன் காரணமாக மலேசியப் பல்கலைக்கழகத்தில் இருந்து வெளியேற்றப்படும் நிலை உருவானதால், கடும் நிதி நெருக்கடியிலும் மன உளைச்சலிலும் சிக்கிய அவர், கண்ணீர் மல்க வீடியோ ஒன்றை வெளியிட்டு உதவிகோரினார். இந்த வீடியோ சமூக வலைதளங்களில் வைரலாகிப் பெரும் கவனத்தைப் பெற்றது.

சமூக வலைதளங்களில் இந்த விவகாரம் காட்டுத்தீ போல் பரவியதைத் தொடர்ந்து, ஏழை மாணவரின் ஆராய்ச்சிப் படிப்பு எக்காரணம் கொண்டும் பாதியிலேயே நின்றுவிடக் கூடாது என்ற குரல்கள் பரவலாக எழுந்தன. இது குறித்து உடனடி கவனம் செலுத்திய தமிழக சமூக நீதித் துறை, மாணவருக்குத் தேவையான அனைத்து உதவிகளையும் அரசு முன்னின்று செய்யும் என்று உறுதியளித்தது. இரண்டு நாட்களுக்குள் நிலுவையில் உள்ள அனைத்து தொகையும் முழுமையாக ஒதுக்கீடு செய்யப்படும் என்றும் துறை சார்ந்த சார்பில் அறிவிக்கப்பட்டது.

இதனைத் தொடர்ந்து, மாணவர் பாரதிதாசனுக்குச் சேர வேண்டிய அம்பேத்கர் அயலக கல்வி உதவித்தொகை முழுமையாக விடுவிக்கப்பட்டுள்ளது. முன்னதாக முதல் தவணையாக ரூ.12.21 லட்சம் விடுவிக்கப்பட்டிருந்த சூழலில், மீதமுள்ள ரூ.23.95 லட்சமும் ஒரே நாளில் விரைவாக விடுவிக்கப்பட்டு அவருடைய கணக்கில் சேர்க்கப்பட்டுள்ளது.

அரசின் இந்த அதிரடி மற்றும் விரைவான நடவடிக்கையின் மூலம், மலேசியாவில் பாரதிதாசன் எதிர்கொண்ட கல்வி மற்றும் நிதிச் சிக்கல்கள் முற்றிலுமாக தீர்ந்துள்ளன. இதனால் எவ்வித தடையுமின்றி அவர் தனது ஆராய்ச்சிப் படிப்பைத் தொடர்ந்து மேற்கொள்வதற்கான கதவுகள் மீண்டும் திறக்கப்பட்டுள்ளன, மேலும் இது போன்ற திட்டங்கள் உரிய நேரத்தில் மாணவர்களுக்குச் சென்றடைவதை அரசு உறுதி செய்ய வேண்டும் என்றும் கோரிக்கைகள் எழுந்துள்ளன.