“ஒரே பிரசவம்… இரண்டு தந்தைகள்”… “ஒரே நேரத்தில் இருவேறு ஆண்களுடன் உடலுறவு”… பிரேசிலில் நிகழ்ந்த மருத்துவ அதிசயம்…!

பிரேசிலில் ஒரே நேரத்தில் இருவேறு தந்தைகளுக்குப் பிறந்த இரட்டைக் குழந்தைகள் குறித்த செய்தி தற்போது உலகையே வியப்பில் ஆழ்த்தியுள்ளது. 19 வயதுடைய இளம்பெண் ஒருவர் பிரசவித்த இந்த இரட்டைக் குழந்தைகளுக்கு தந்தை யார் என்ற சந்தேகம் எழுந்த நிலையில், மேற்கொள்ளப்பட்ட டிஎன்ஏ (DNA) பரிசோதனையில் ஒரு குழந்தைக்கு ஒரு தந்தையும், மற்றொரு குழந்தைக்கு வேறொரு தந்தையும் இருப்பது உறுதி செய்யப்பட்டுள்ளது. இந்த அதிர்ச்சியூட்டும் உண்மையைத் தொடர்ந்து, அந்தப் பெண் தான் ஒரே நாளில் இருவேறு ஆண்களுடன் உடலுறவு கொண்டதை ஒப்புக்கொண்டார்.

மருத்துவ ரீதியாக ‘ஹெட்டெரோபேட்டர்னல் சூப்பர்ஃபெகுண்டேஷன்’ (Heteropaternal Superfecundation) என்று அழைக்கப்படும் இந்த நிகழ்வு, மனிதர்களிடையே மிகவும் அரிதானது. பெண்ணின் உடலில் ஒரே மாதவிடாய் சுழற்சியில் இரண்டு கருமுட்டைகள் உருவாகி, அவை குறுகிய கால இடைவெளியில் இருவேறு ஆண்களின் விந்தணுக்களால் கருத்தரிக்கப்படும்போது இத்தகைய இரட்டையர்கள் பிறக்கின்றனர். விந்தணுக்கள் பெண் இனப்பெருக்கப் பாதையில் சில நாட்கள் வரை உயிர்வாழும் திறன் கொண்டவை என்பதால், இத்தகைய அரிய நிகழ்வு சாத்தியமாகிறது.

இந்த விசித்திரமான பிரசவம் குறித்து கருத்து தெரிவித்துள்ள மருத்துவர் துலியோ ஜார்ஜ் ஃபிராங்கோ, இதுவரை உலகம் முழுவதும் இத்தகைய நிகழ்வுகள் 20 முறை மட்டுமே பதிவு செய்யப்பட்டுள்ளதாகக் குறிப்பிட்டுள்ளார். குழந்தைகள் இருவரும் தாயின் மரபணுவைப் பகிர்ந்து கொண்டாலும், வெவ்வேறு தந்தைகளின் கருவில் இருந்து உருவானதால் தனித்தனி நஞ்சுக்கொடிகளில் வளர்ந்துள்ளனர். பொதுவாக நாய், பூனை மற்றும் பசு போன்ற விலங்குகளில் இத்தகைய இனப்பெருக்க முறை இயல்பாகக் காணப்பட்டாலும், மனிதர்களில் இது மிக அரிதாகவே நிகழ்கிறது.

தற்போது ஒரு வயது எட்டியுள்ள அந்த இரட்டைக் குழந்தைகள் இருவரும் ஆரோக்கியமாக இருப்பதாகவும், உருவ ஒற்றுமையில் அவர்கள் ஒரே மாதிரியாகத் தெரிவதாகவும் அந்தப் பெண் தெரிவித்துள்ளார். ஆரம்பத்தில் இந்த உண்மையை அறிந்து அதிர்ச்சியடைந்தாலும், தற்போது ஒரு தந்தை மட்டுமே இரண்டு குழந்தைகளுக்கும் பொறுப்பேற்று வளர்த்து வருவதாகக் கூறப்படுகிறது. அறிவியலின் விந்தையாகப் பார்க்கப்படும் இந்தச் சம்பவம், மருத்துவ உலகில் பெரும் விவாதத்தை ஏற்படுத்தியுள்ளது.