திருமா சொன்ன ‘நோ’.. ரூட்டை மாற்றிய தைலாபுரம்…. தவெக-வுடன் ரகசிய டீல்?- பரபரக்கும் பாமக….!

தமிழக அரசியலில் பெரும் பரபரப்பை ஏற்படுத்தியுள்ள பாட்டாளி மக்கள் கட்சியின் உட்கட்சிப் பூசல்களுக்கு மத்தியில், டாக்டர் ராமதாஸ் தலைமையிலான அணி நடிகர் விஜய்யின் தமிழக வெற்றிக் கழகத்துடன்  கூட்டணி அமைக்கப் பேச்சுவார்த்தை நடத்தி வருவதாகத் தகவல்கள் வெளியாகியுள்ளன. சேலம் மேற்கு தொகுதி பாமக எம்.எல்.ஏ அருள், ராமதாஸ் தரப்பு தவெக-வுடன் கூட்டணி குறித்துப் பேசி வருவதை அதிகாரப்பூர்வமாக உறுதிப்படுத்தியுள்ளார். ஏற்கனவே பாமகவில் ராமதாஸ் மற்றும் அன்புமணி ஆகியோருக்கு இடையே கருத்து வேறுபாடு ஏற்பட்டு இரு அணிகளாகப் பிரிந்துள்ள நிலையில், இந்த நகர்வு அரசியல் வட்டாரத்தில் முக்கியத்துவம் வாய்ந்ததாகக் கருதப்படுகிறது.

முன்னதாக, ராமதாஸ் தரப்பு திமுக தலைமையிலான கூட்டணியில் இணைய ஆர்வம் காட்டியதாகக் கூறப்படுகிறது. இதற்காக அமைச்சர் எ.வ.வேலு மூலம் முயற்சிகள் மேற்கொள்ளப்பட்ட போதிலும், திமுக கூட்டணியில் அங்கம் வகிக்கும் விடுதலைச் சிறுத்தைகள் கட்சித் தலைவர் திருமாவளவன் கடும் எதிர்ப்புத் தெரிவித்ததாகத் தெரிகிறது. பாமக மற்றும் பாஜக ஆகிய கட்சிகளுடன் கூட்டணி வைக்கக் கூடாது என்பதில் அவர் உறுதியாக இருந்ததால், திமுக தலைமை ராமதாஸ் அணியினரைச் சேர்க்க முன்வரவில்லை. இதன் காரணமாகவே கடந்த சில நாட்களாக ராமதாஸ் திமுகவை மிகக் கடுமையாக விமர்சித்து வருகிறார்.

இந்தச் சூழலில், திமுக மற்றும் அதிமுக ஆகிய இரு துருவ அரசியலுக்கு மாற்றாகத் தமிழகத்தில் ஒரு ‘மூன்றாவது அணி’ உருவாகும் வாய்ப்புகள் தென்படுகின்றன. இது குறித்துப் பேசிய எம்.எல்.ஏ அருள், தேர்தல் காலங்களில் பல கட்சிகளுடன் கூட்டணி பேச்சுவார்த்தை நடத்துவது இயல்பான ஒன்றுதான் என்றும், இன்னும் ஒரு வாரத்தில் கூட்டணி குறித்த இறுதி முடிவு அறிவிக்கப்படும் என்றும் தெரிவித்துள்ளார். மேலும், தவெக தலைவர் விஜய்யை இளைஞர்கள் தேனீக்கள் போலச் சூழ்ந்துள்ளதாகவும், அரசியல் களத்தில் யாரையும் குறைத்து மதிப்பிட முடியாது என்றும் அவர் குறிப்பிட்டுள்ளார்.

அன்புமணி ராமதாஸ் தலைமையிலான அணி ஏற்கனவே அதிமுக – பாஜக கூட்டணியில் இணைந்துவிட்ட நிலையில், ராமதாஸ் அணி விஜய்யுடன் கைகோர்ப்பது வட தமிழக வாக்கு வங்கியில் பெரும் தாக்கத்தை ஏற்படுத்தும் என எதிர்பார்க்கப்படுகிறது. பாமகவுக்காக முன்னர் பணியாற்றிய வியூக வகுப்பாளர் ஜான் ஆரோக்கியசாமி மூலமாக இந்தப் பேச்சுவார்த்தைகள் முன்னெடுக்கப்பட்டு வருவதாகக் கூறப்படுகிறது. ஒருவேளை இந்தக் கூட்டணி உறுதியானால், அது வரும் சட்டமன்றத் தேர்தலில் திமுக மற்றும் அதிமுக ஆகிய இரு அணிகளுக்கும் சவாலாக அமையக்கூடும் என அரசியல் நோக்கர்கள் கருதுகின்றனர்.