இந்தியில் உருவாக இருந்த ‘துப்பாக்கி’ படத்தில் விஜய் வந்தது எப்படி?… அமரன் இயக்குனர் பகிர்ந்த சம்பவம்!

தமிழ் சினிமாவில் இன்றிருக்கும் மிகவும் பிரபலமான நடிகர்களில் ஒருவர் விஜய். தன்னுடைய புகழின் உச்சியில் இருக்கும் விஜய் ரஜினிகாந்தை விட அதிக சம்பளம் வாங்கும் தமிழ் நடிகர் என்ற சாதனையைப் படைத்துள்ளார். அதற்கேற்றார் போல அவரின் சுமாரான படங்கள் கூட நல்ல வசூலைப் பெற்று வருகின்றன.

தற்போது மாஸ் நடிகராக இருக்கும் விஜய், 90 களில் தனக்கான இடத்துக்காக போராடிக் கொண்டிருந்தார். இடையிடையே ஹிட் கொடுத்திருந்தாலும் அவருக்கென்று ஒரு நிலையான மார்க்கெட் கில்லி படத்துக்கு முன்பே உருவானது. அதனால் அதற்கு முந்தைய படங்களில் எல்லாம் தன்னுடைய படத்தில் துறைசார்ந்த பிரபலங்கள் இருக்க வேண்டும், அது படத்தின் பிஸ்னஸுக்கு உதவும் என விரும்புவார்.

அதே போல அவரை அடுத்த கட்டத்துக்கு உயர்த்திய திரைப்படம் என்றால் அது ஏ ஆர் முருகதாஸ் இயக்கத்தில் உருவான துப்பாக்கி திரைப்படம்தான். அந்த படம்தான் முதல் முதலில் விஜய் நடித்ததில் 100 கோடி ரூபாய் வசூல் செய்த படம் என்று சொல்லப்படுகிறது. அதன் பின்னர் விஜய்யின் மார்க்கெட் ஏறுமுகத்தில் சென்று இன்று இந்தியாவிலேயே அதிக சம்பளம் வாங்கும் நடிகராக உள்ளார்.

இந்நிலையில் துப்பாக்கி படத்தில் உதவி இயக்குனராக பணியாற்றிய அமரன் பட இயக்குனர் ராஜ்குமார் பெரியசாமி இந்த படத்தில் விஜய் வந்தது பற்றிக் கூறியுள்ளார். அதில் “துப்பாக்கி படம் முதலில் உருவாகும் போது இந்தி படமாகதான் உருவானது. அப்போது அதில்  விஜய் இல்லை. அப்போது ஒரு நாள் ஏ அர் முருகதாஸ் சார் இதை தமிழில் எடுக்கலாமா? எடுத்தால் யாரை நடிக்க வைக்கலாம்? எனக் கேட்டார்.

அப்போது நானும் அஜய் ஞானமுத்துவும் விஜய் நடித்தால் நன்றாக இருக்கும்  என சொன்னோம். அந்த நேரம் பார்த்து எஸ் ஏ சி சார் போன் செய்து “விஜய்க்கு எதாவது கதை இருக்கிறதா?” எனக் கேட்டார். அப்போதுதான் முதலில் தமிழில் எடுத்துவிட்டு பின்னர் இந்தியில் இயக்கலாம் என முடிவு செய்தோம்” எனக் கூறியுள்ளார்.