நான்லாம் எப்ப கமல் மாதிரி ஹீரோவாகி அதிக சம்பளம் வாங்கப் போறனோ?… நடிகையின் அம்மாவிடம் புலம்பிய ரஜினி!

1975 ஆம் ஆண்டு வெளியான அபூர்வ ராகங்கள் திரைப்படத்தின் மூலமாக தமிழ் சினிமாவில் அறிமுகமானார் ரஜினிகாந்த். அந்த படத்தில் ஒரு மிகச்சிறிய வேடமே அவருக்குக் கொடுக்கப்பட்டு இருந்தது. அதன் பிறகு மூன்று முடிச்சு உள்ளிட்ட திரைப்படங்களில் வில்லனாக நடித்து தனக்கென ஒரு ஸ்டைலை உருவாக்கினார்.

படத்தின் கதாநாயகர்களுக்கு இணையாக அவருக்கும் கைதட்டல், விசில்கள் கிடைக்க ஆரம்பித்தன. இந்த நேரத்தில் பைரவி படத்தில் கதாநாயகனாக நடித்தார் ரஜினி. அந்த படம் வெற்றி பெற்று அவரை நிரந்தரக் கதாநாயகனாக்கி விட்டது. ஆனால் அதன் பிறகு ரஜினியை ஒரு வெற்றிகரமான கதாநாயகன் ஆக்கியது பஞ்சு அருணாச்சலம்தான். அவர்தான் பிரியா என்ற படத்தில் ரஜினியைக் கதாநாயகன் ஆக்கி சிங்கப்பூர் எல்லாம் சென்று படமாக்கி வந்தார்.

ஆனாலும் சில ஆண்டுகள் தன்னால் ஒரு நிரந்தர ஹீரோவாகிவிட முடியும் என்ற நம்பிக்கை ரஜினிக்கு இல்லையாம். இதுபற்றி மறைந்த நடிகை ஸ்ரீதேவி ஒரு சுவாரஸ்யமான தகவலை ஒரு நேர்காணலில் பகிர்ந்துள்ளார். அதில் “நான், ரஜினி மற்றும் கமல் ஆகிய மூவரும் மூன்று முடிச்சு படத்தில் இணைந்து நடித்தோம். அந்த படத்தில் கமல்ஹாசனுக்கு 30000 ரூபாய் சம்பளம், எனக்கு 5000 ரூபாய், ரஜினிக்கோ 2000 ரூபாய்தான்.

அப்போது ரஜினி, நான் எப்போதாவது கமல் மாதிரி ஹீரோவாகி அவர் வாங்குவது போல சம்பளம் வாங்குவேனா? எனக் கூறியுள்ளார். அதைக் கேட்ட என் அம்மா, கண்டிப்பா நீங்களும் ஹீரோ ஆவீங்க.. அதே போல அதிக சம்பளம் வாங்குவீங்க என்றார்” எனக் கூறியுள்ளார்.

ஸ்ரீதேவி அம்மா சொன்னது போலவே அடுத்த சில ஆண்டுகளிலேயே ரஜினி ஹீரோவானார். அதுமட்டுமில்லாமல் கமல்ஹாசனை விட அதிக சம்பளம் வாங்கும் சூப்பர் ஸ்டார் நடிகரானார் என்பதுதான் இதில் சுவாரஸ்யம்.