தமிழகத்தில் TVK-வின் தாக்கம் அதிகம்… உண்மையை ஒத்துக்கொண்ட முன்னாள் அமைச்சர் ராஜேந்திர பாலாஜி..!!

விருதுநகர் மாவட்டம் ஸ்ரீவில்லிபுத்தூரில் நேற்று செய்தியாளர்களைச் சந்தித்த முன்னாள் அமைச்சர் கே.டி. ராஜேந்திரபாலாஜி, தமிழக அரசியலில் இளைஞர்கள் மத்தியில் தமிழக வெற்றிக் கழகம் (தவெக) ஒரு குறிப்பிட்ட தாக்கத்தை ஏற்படுத்தியிருப்பதை ஒப்புக்கொண்டார். இருப்பினும், அந்தத் தாக்கம் தேர்தலில் வெற்றி பெற்று ஆட்சியைக் கைப்பற்றும் அளவுக்குப் போதுமானதாக இல்லை என்று அவர் விமர்சித்தார். தவெகவின் வருகை அதிமுகவின் வெற்றியைப் பாதிக்காது என்றும், இறுதியில் அதிமுகவே வெற்றி பெற்று மீண்டும் ஆட்சியில் அமரும் என்றும் அவர் உறுதியாகத் தெரிவித்தார்.

தேர்தல் கருத்துக்கணிப்புகள் குறித்துப் பேசிய அவர், 2016-ஆம் ஆண்டு சட்டப்பேரவைத் தேர்தலை உதாரணமாகக் காட்டினார். அப்போது பெரும்பாலான கருத்துக்கணிப்புகள் திமுகதான் வெற்றி பெறும் என்று கணித்த போதிலும், அவற்றையெல்லாம் முறியடித்து அதிமுக தனிப் பெரும்பான்மையுடன் ஆட்சியைத் தக்கவைத்துக் கொண்டதை அவர் நினைவு கூர்ந்தார். குறிப்பாக, தமிழக அரசியல் களம் தெரியாமல் வடநாட்டுப் பத்திரிகையாளர்கள் எடுக்கும் கருத்துக்கணிப்புகள் பெரும்பாலும் தவறாகவே முடியும் என்றும், மக்களின் உண்மையான மனநிலை அதிமுகவிற்கு ஆதரவாக இருப்பதாகவும் அவர் குறிப்பிட்டார்.