“யாரும் எதிர்பார்க்காத ட்விஸ்ட்”…. ராகுல் – விஜய் ‘ஃபயர்’ ரகசியம்…. தவெகவிற்கு ஆதரவு கிடைச்சிடுச்சே…!

தமிழக சட்டசபை தேர்தல் முடிவுகள் ஒரு தொங்கு சட்டசபையை உருவாக்கியுள்ள நிலையில், 108 தொகுதிகளில் வெற்றி பெற்று தனிப்பெரும் கட்சியாக உருவெடுத்துள்ள தமிழக வெற்றிக் கழகம் (தவெக), ஆட்சியைப் பிடிக்கத் தேவையான 118 என்ற மேஜிக் எண்ணை எட்ட தீவிர முயற்சியில் இறங்கியுள்ளது. அக்கட்சியின் தலைவர் விஜய் இரண்டு தொகுதிகளில் வெற்றி பெற்றுள்ளதால், ஒரு தொகுதியை ராஜினாமா செய்யும் பட்சத்தில் பலம் 107 ஆக குறையும். இதனால் பெரும்பான்மையை நிரூபிக்க இன்னும் 11 எம்எல்ஏக்களின் ஆதரவு அவருக்கு அவசியமாகிறது. இந்த இக்கட்டான சூழலில், காங்கிரஸ் கட்சியின் 5 எம்எல்ஏக்களின் ஆதரவை விஜய் கோரியுள்ளதாகத் தகவல்கள் வெளியாகியுள்ளன.

திமுக கூட்டணியில் அங்கம் வகிக்கும் காங்கிரஸ் கட்சியிடம் விஜய் ஆதரவு கோரியுள்ள நிலையில், நேற்று ராகுல் காந்தி விஜய்யைத் தொலைபேசியில் அழைத்து வாழ்த்து தெரிவித்திருந்தார். அப்போது இருவருக்கும் இடையே ஆட்சி அமைப்பதற்கான ஆதரவு குறித்து ஆலோசிக்கப்பட்டதாகக் கூறப்படுகிறது. இதனை காங்கிரஸ் பொதுச்செயலாளர் கே.சி. வேணுகோபாலும் உறுதிப்படுத்தியிருப்பது அரசியல் வட்டாரத்தில் பெரும் பரபரப்பை ஏற்படுத்தியுள்ளது. நீண்ட காலமாக திமுகவுடன் பயணப்பட்டு வரும் காங்கிரஸ், தற்போது தவெக-வை நோக்கி நகர்வது தமிழக அரசியலில் புதிய மாற்றத்திற்கான அறிகுறியாகப் பார்க்கப்படுகிறது.

இந்த அரசியல் நகர்வுகளுக்கு வலு சேர்க்கும் விதமாக, பீகார் மாநில காங்கிரஸ் கட்சியின் அதிகாரப்பூர்வ எக்ஸ் (X) பக்கத்தில் வெளியிடப்பட்டுள்ள பதிவு தற்போது காட்டுத்தீயாய் பரவி வருகிறது. ராகுல் காந்தி மற்றும் விஜய் ஆகியோரின் புகைப்படங்களை இணைத்து ‘ராகுல் + விஜய்’ (Rahul + Vijay) என்று பதிவிட்டு, அதனுடன் ஒரு ‘ஃபயர்’ (Fire) எமோஜியையும் சேர்த்துள்ளனர். வழக்கமாக மாநிலத் தேர்தல் வெற்றிகளுக்கு அகில இந்தியத் தலைவர்கள் வாழ்த்துவது சகஜம் என்றாலும், ஒரு குறிப்பிட்ட மாநிலக் கட்சியின் பதிவை மற்றொரு மாநில காங்கிரஸ் பிரிவு “ஃபயர்” விட்டு கொண்டாடுவது இதுவே முதல்முறை.

இந்த சமூக வலைதளப் பதிவு, தமிழகத்தில் தவெக ஆட்சி அமைக்க காங்கிரஸ் ஆதரவு வழங்கத் தயாராகிவிட்டது என்பதையே மறைமுகமாக உணர்த்துவதாக அரசியல் விமர்சகர்கள் கருதுகின்றனர். திமுக கூட்டணியில் இருந்து விலகி, விஜய்யின் கரத்தை காங்கிரஸ் பிடிக்குமா என்ற கேள்வி தற்போது தமிழகத்தின் பேசுபொருளாக மாறியுள்ளது. பீகார் காங்கிரஸின் இந்த ‘ஃபயர்’ பதிவு வெறும் வாழ்த்துதானா அல்லது தமிழகத்தின் புதிய அதிகார மாற்றத்திற்கான அதிகாரப்பூர்வமான தொடக்கமா என்பது இன்னும் சில தினங்களில் தெரிந்துவிடும்.