“எங்க பிடிஆர் வர்றாரு.. வழி விடுங்க”…. 2026 தேர்தலில் அதிரடி என்ட்ரி…. திமுக கோட்டையில் மீண்டும் பிடிஆர் தியாகராஜன்….!

2026 தமிழக சட்டமன்றத் தேர்தல் களம் சூடுபிடிக்கத் தொடங்கியுள்ள நிலையில், திமுகவின் முக்கிய முகங்களில் ஒருவரும், தகவல் தொழில்நுட்பத் துறை அமைச்சருமான பிடிஆர் பழனிவேல் தியாகராஜன் மீண்டும் தனது அரசியல் பயணத்தைத் தொடரத் தயாராகிவிட்டார். சென்னை அண்ணா அறிவாலயத்தில், மதுரை மத்திய தொகுதியில் போட்டியிடுவதற்கான விருப்ப மனுவை அவர் தாக்கல் செய்துள்ளார். இதன் மூலம் வரும் தேர்தலில் அவர் களமிறங்குவது தற்போது உறுதி செய்யப்பட்டுள்ளது.

அரசியல் பாரம்பரியம் மிக்க குடும்பத்தைச் சேர்ந்த பிடிஆர், தனது தாத்தா பி.டி. ராஜன் மற்றும் தந்தை பி.டி.ஆர். பழனிவேல் ராஜன் ஆகியோரின் வழியைப் பின்பற்றி மக்கள் பணியாற்றுவதில் உறுதியாக உள்ளார். முன்னதாக, 10 ஆண்டுகள் மட்டுமே பொது வாழ்வில் ஈடுபடப் போவதாகக் கூறி வந்த அவர், தற்போது தனது முடிவை மாற்றிக் கொண்டுள்ளார். தனது தொகுதி மக்களின் அளப்பரிய அன்பும், முதலமைச்சர் மு.க. ஸ்டாலின் அவர்கள் வழங்கிய அமைச்சர் பொறுப்பும், மக்கள் நலப் பணிகளில் தொடர்ந்து ஈடுபடத் தூண்டியதாக அவர் நெகிழ்ச்சியுடன் தெரிவித்துள்ளார்.

கடந்த காலங்களில் பல்வேறு அரசியல் சலசலப்புகள் மற்றும் ஆடியோ விவகாரங்கள் எழுந்தபோதிலும், கட்சித் தலைமையுடன் அவருக்கு மனக்கசப்பு இருப்பதாகப் பேசப்பட்ட கருத்துகளுக்கு இந்த விருப்ப மனுத் தாக்கல் முற்றுப்புள்ளி வைத்துள்ளது. “கழக உடன்பிறப்புகளில் ஒருவனாக” மீண்டும் வாய்ப்புக் கேட்டுள்ள அவர், முன்னோர்களின் அர்ப்பணிப்பு மிக்க பாதையில் தொடர்ந்து பயணிக்க விரும்புவதாகத் தனது சமூக வலைதளப் பக்கத்தில் பதிவிட்டுள்ளார்.

மதுரை மத்திய தொகுதியில் ஏற்கனவே இருமுறை வெற்றி பெற்றுள்ள பிடிஆர், இந்த முறையும் வெற்றி பெற்று ‘ஹாட்ரிக்’ அடிப்பாரா என்ற எதிர்பார்ப்பு எழுந்துள்ளது. இருப்பினும், அங்கே அதிமுக, பாஜக மற்றும் வளர்ந்து வரும் தமிழக வெற்றிக் கழகம் ஆகிய கட்சிகளிடமிருந்து அவருக்குக் கடும் போட்டி நிலவும் என எதிர்பார்க்கப்படுகிறது. எதுவாக இருப்பினும், தனது கல்வி மற்றும் உலகளாவிய அனுபவத்தைத் தமிழக முன்னேற்றத்திற்காகத் தொடர்ந்து பயன்படுத்தப் போவதாக அவர் சமிக்ஞை கொடுத்துள்ளார்.