நேரம் ஆச்சு எடுங்க சார்!.. திருப்பூர் பஸ் ஸ்டாண்டில் ரகளை… நேரக் கட்டுப்பாடு கேள்வியால் வெடித்த மோதல்… வீடியோ வெளியாகி பரபரப்பு…!!

திருப்பூர் மத்திய பேருந்து நிலையத்தில் திங்கள்கிழமை காலை நிலவிய வழக்கமான பரபரப்பிற்கு இடையே எதிர்பாராத ஒரு மோதல் அரங்கேறியது. காலை 7 மணிக்கு ஈரோட்டிற்குப் புறப்பட வேண்டிய ஒரு தனியார் பேருந்து, அதற்கான நேரம் கடந்த பின்பும் நடைமேடையிலேயே நிறுத்தப்பட்டிருந்தது. பயணிகள் காத்திருந்த நிலையில், பேருந்தை இயக்க வேண்டிய ஓட்டுநர் குமார் மற்றும் நடத்துநர் குணசேகரன் ஆகியோர் வேண்டுமென்றே காலதாமதம் செய்து பேருந்தை எடுக்காமல் இருந்ததாகக் கூறப்படுகிறது.

இதனை கவனித்த அரசுப் போக்குவரத்துக் கழகத்தின் சோதனை ஆய்வாளரான முத்தையன், சம்பந்தப்பட்ட தனியார் பேருந்து ஓட்டுநர் மற்றும் நடத்துநரிடம் சென்று பேருந்தை உடனடியாக எடுக்குமாறு அறிவுறுத்தியுள்ளார். அப்போது அவர்களுக்குள் கடுமையான வாக்குவாதம் ஏற்பட்டு, அது முற்றியதில் கைகலப்பாக மாறியது. ஆத்திரமடைந்த ஓட்டுநரும் அரசு அதிகாரியும் தரையில் கட்டிப்புரண்டு ஒருவரையொருவர் கடுமையாகத் தாக்கிக் கொண்ட சம்பவம், அங்கு நின்றிருந்த பயணிகளிடையே பெரும் அதிர்ச்சியை ஏற்படுத்தியது.

பின்னர், அங்கிருந்த சக ஊழியர்கள் மற்றும் பயணிகள் தலையிட்டு அவர்களைப் பிரித்து சண்டையை தடுத்து நிறுத்தினர். இந்த மோதலில் காயமடைந்த அரசு அதிகாரி முத்தையன், சிகிச்சைக்காக திருப்பூர் அரசு மருத்துவமனையில் அனுமதிக்கப்பட்டார். அவர் அளித்த புகாரின் அடிப்படையில் வழக்குப்பதிவு செய்த காவல் துறையினர், தாக்குதலில் ஈடுபட்ட தனியார் பேருந்து ஓட்டுநர் மற்றும் நடத்துநரைக் கைது செய்துள்ளனர். இதற்கிடையே, பேருந்து நிலையத்தில் அவர்கள் சண்டையிட்டதை அங்கிருந்தவர்கள் பதிவு செய்த காணொளி தற்போது சமூக வலைத்தளங்களில் வேகமாகப் பரவி வருகிறது.