மாணவர்களா..? மாடுகளா..? சரக்கு வாகனத்தில் குழந்தைகளை ஏற்றி ‘சுற்றுலா’ சென்ற தலைமையாசிரியர் அதிரடி சஸ்பெண்ட்.. அதிரவைக்கும் வீடியோ..!!

கர்நாடக மாநிலம் மங்களூரு அருகே பெல்தங்கடியில் உள்ள ஒரு அரசுப் பள்ளியில், மாணவர்களின் உயிரோடு விளையாடிய தலைமை ஆசிரியரின் செயல் பெரும் அதிர்ச்சியை ஏற்படுத்தியுள்ளது. மாணவர்களைக் கல்விச் சுற்றுலா அழைத்துச் செல்ல முறையான பேருந்து வசதிகளைச் செய்யாமல், அவர்களைக் கால்நடைகளைப் போலச் சரக்கு வாகனத்தில் (Pick-up truck) ஏற்றி அழைத்துச் சென்றுள்ளனர். ஆபத்தான முறையில் மாணவர்கள் அந்த வாகனத்தில் நெரிசலாக அமர்ந்திருக்கும் காட்சிகள் சமூக வலைதளங்களில் வெளியாகி, பெற்றோர்கள் மற்றும் பொதுமக்கள் மத்தியில் கடும் கொந்தளிப்பை ஏற்படுத்தியது.

இந்த விவகாரம் குறித்து கல்வித்துறை அதிகாரிகள் நடத்திய விசாரணையில், தேன் பண்ணை ஒன்றிற்கு மாணவர்களை அழைத்துச் செல்லத் திட்டமிட்ட தலைமை ஆசிரியர் கிரண், விதிமுறைகளை மீறிச் செயல்பட்டது உறுதி செய்யப்பட்டது. மாணவர்களின் பாதுகாப்பில் அலட்சியமாக இருந்ததற்காகத் தலைமை ஆசிரியர் கிரண் தற்போது உடனடியாகப் பணி இடைநீக்கம் (Suspension) செய்யப்பட்டுள்ளார். பிஞ்சு குழந்தைகளின் பாதுகாப்பை உறுதி செய்ய வேண்டிய பள்ளிகளே இது போன்ற பொறுப்பற்ற செயல்களில் ஈடுபடுவது கண்டனத்திற்குரியது எனப் பலரும் சமூக வலைதளங்களில் பதிவிட்டு வருகின்றனர்.